Roxas ug Duterte?
Mosuporta ko sa sugyot nga undangon na ni DILG Secretary Mar Roxas ang pagpangulitawo ni Senador Grace Poe aron iya unta nga ikapares sa pagka bise presidente. Tan-aw nako, nakahukom na si Poe nga pagka presidente g’yud sa nasud ang iyang daganan. Daghan og kapilian si Mar.
Kaniadto akong gisugyot nga haum nga ipares ni Mar mao si Batangas Governor Vilma Santos tungod sa iyang katakos, kalimpiyo ug kasinatian sa pagpadagan sa lokal nga kagamhanan.
Si Vilma nahimong mayor sa Lipa City ug gobernador sa Batangas, gawas sa iyang pagka artista.
Karon maoy akong isugyot ngadto ni Mar Roxas ug sa Partido Liberal nga pangulitawhan nila si Davao City Mayor Rodrigo Duterte.
Si Duterte mipahibalo nga moretiro na siya sa politika ug dili magpapili pagka presidente sa nasud bisan pa man sa pag-awhag sa iyang mga dumadapig.
Wa g’yud ko motuo nga hingpit na nga moretiro sa politika si Duterte busa akong isugyot sa Partidong Liberal ang pagkuha kang Duterte isip bise ni Roxas.
Ang Roxas-Duterte nga kombinasyon usa ka lig-on nga kombinasyon kay panaghugpong kini sa botos nga gikan sa Visayas ug Mindanao.
Ang Roxas-Duterte nga kombinasyon kahigayonan nga ang Visayas ug Mindanao makapalingkod na usab og presidente ug bise presidente sa nasud.
Panahon na kini nga ang reklamo nato sa imperial Manila maputol. Ang Roxas-Duterte nga kombinasyon maayo nga kombinasyon kay hugot sila sa kampanya sa anti-corruption ug anti-criminality.
Di ba mao man kini ang atong gipangita? Ngano nga maglisudlisod pa man ang Liberal? Kun ako si Roxas, si Duterte ang akong kuhaon nga bise aron akong masuyop ang boto sa Visayas ug Mindanao.
Kun modagan si Grace Poe ug Jejomar Binay sa pagka presidente, segurado na si Roxas sa Malakanyang kay mabahin man ang boto sa Luzon nila ni Poe ug Binay.
- Latest
