Ang kinabuhi karon buot og paspas kon express halos sa tanang aspeto. Daghan ang kanunay nga magdali daghan ang buot makahuman og mga butang o buluhaton sa tukmang takna o panahon. Nindot kini nga kawsa apan sa laing bahin mahinungdanon usab unta nga atong hatagan og igong pagtagad ang paghinay matag karon ug unya aron mohimo kita og paghinuklog sa nahitabo nato. Sa akong pagtagik niini among gihimo ang paglubong sa usa sa mga hermano mayores sa parokya sa Capitol. Tumatabang kining maong banay ug simple ra pud sila nga pagkatawo. Tuod man sa dihang gihimo ang pagresponso didto sa columbary, akong nakita nga bisan pa man kun abo nga sinulod sa urna ang isulod na sa vault apan gihimo kini sa paagi nga pinahimutang ug hinay. Matag gutlo balaanon ug mahinungdanon nga tungod niini mas makaayo nga kini himoon sa paagi nga solemne. Diha sa atong kinabuhi mahimong atong mapundo ang mga maanindot nga bulok sa kinabuhi apan wala kini magpasabot nga nahimong atong masipong ang kasinatian. Ug aron dili kita magmahay, mahinungdanong atong tagamtamon ang kasamtangan sa paagi nga hinay apan makahuloganon.