Gihisgutan nato sa miagi ang pag-inom sa mga herbal tea o tsa, nga usa ni sa maayong paagi sa pagpakalma sa stress. Ania ang uban, atong ipadayon;
* Mga pag-ehersisyo — Sulod sa 20-30 ka minutos kada adlaw, igo na makapawagtang o mamenusan ang kakapoy sa stress mo, sama sa..
(a) Dasig nga paglakaw — sa ilawom o taliwala sa mga punoan sa tanom o kakahoyan…(b) Pagginhawa - kanang istilo nga ginganla'g '478 breathing exercise' nga ingon niini ang buhaton…ibuga ang ginhawa gikan sa baba, unya hingosa sa ilong sud sa 4ka segundos, unya pugngi ang ginhawa sud sa 7ka segundos, unya inanaya nga ipagawas ang ginhawa mo sud sa 8ka segundos. Buhata ni kaduha sa usa ka adlaw. Kun kulbaan ka gani, motindog molakaw nga moginhawa dayon og lawom, aron dili maghuot ang dughan mo.
* Positibo nga panghunahuna — unsa may moabot o motumaw sa hunahuna, dili maratol. Ikalma lang permi ang utok, nga maoy irehistro sa isip mo ang mga kaayohan sa problema di ka'y maugtas dayon, mao'ng ma-tress ka.
* Pamalandong — iposisyon ang lawas nga nakalingkod o nakayaka nga tuyhad ang lawas nga nakapwesto'ng nakabutang sa paa ang 2ka kamot. Mopiyong nga di paestorbo nga nakapukos sa hunahuna. Nga relaks suhiron o ihapsay ang gubot nga kaisipan. Hinabia sa hunahuna ang kaugalingon mo. Mamalandong aron matugkad ang pagkahimutang sa tanan mong gihunahuna. Sa sama'ng sitwasyon inormal ang imong pagginhawa hangtud mabatyagan ang kagaan na sa katibuk-an sa panglawas mo. Dayon modupa nga mapahiyumon.