Angay g’yud nga gantihan ang mga kawani sa Cebu City Hall, ilabi na ang mga sakop sa Department of Public Services (DPS), nga abtik kaayo nga nanglimpyo sa kadalanan sa dakbayan human sa Sinulog Grand Parade.
Sa paghuman g’yud sa parada, nahabilin ang hilabihan kadaghan nga mga sagbot sama sa selopin ug ubang putos sa mga pagkaon nga gipanglabay lang sa mga tawo diha sa karsada.
Wala magsilbi ang pasiatab sa kadagkoan sa City Environmental Sanitation Enforcement Team (CESET) nga pangdakpon ang mga tawo nga magpataka og labay’g mga sagbot.
Abtik kaayo ang mga sakop sa DPS ug ubang kawani sa City Hall nga nanglimpyo pagkahuman g’yud sa Sinulog Grand Parade mao nga pagkabuntag kagahapon, limpyo na ang dakbayan.
Kun giusik-usikan man sa mga opisyal sa dakbayan ang buhis sa katawhan pinaagi sa paghatag og honoraryom sa mga opisyal sa barangay nga wala magserbisyo og tarong, ingon man paghatag og cash assistance sa mga senior citizens nga wala dinhi magpuyo, angay lang nga hatagan og pahalipay ang mga kawani sa DPS.