CEBU, Philippines – Sa biblical nga kasaysayan, ang atong nasod maoy gitumbok sa kahitas-an nga iyang mga katawhan. Mao nga pinangga kita sa Dios kay gihatagan man kita sa tanan natong panginahanglan.Usa niini ang dakong kapuslanan o gahum sa birtud nga anaa sa mga tanom, nga tinubdan sa kusog sa kinabuhi.
Ang liso sa mga tanom, bisan dili kini iluyong imo lang isalibay sa yuta motubo na. Segun sa mga eksperto, halos tanang tanom nga nabuhi sa atong palibot, aduna kini mga birtud sa pag-ayo sa mga sakit. Mao nga daghang langyaw karon ang naghimo og mga pagtuon o pagdukiduki, aron pagdiskubre sa mga tanom nga kakuhaan nila’g kapuslanan alang sa atong panglawas. Nabaniog na karon sa kalibutan ang pipila sa atong mga tanom nga nasulayan nang epektibo kaayong natural nga tambal, sama sa lagundi o tugas o molave, alang sa ‘respiratory’ nato (hubak, sip-on o ubo). Tan-awa di ba gidagsaan na ta sa mga ‘food supplements’ nga dili atoa ang kredito.
Kita unta ang angay maghingusog sa pagpalambo sa birtud sa mga tanom, di lang sa panglawas hasta na ang personal o ekonomiya sa atong nasud mulambo usab. Usa kini sa positibong panlantaw nga kita makaseguro gyung mabulahan kun magpakabana ta nga may inisyatibo sa pagpalambo ini. Sugdan nato ang pagkat-on sa pagbaton og kaikag sa pag-ila sa mga tanom nga may birtud o gahum. Mga grasya kining gigasa kanato sa kahitas-an. Anaa na kanato gisaligang unsa may makuhang kapuslanan alang ning kalamboan, ilabi na ang alang sa pagbaton permi og maayong panglawas.
Busa atong dasigon ang gobyerno nato nga molusad og tinud-anay nga pagpalambo ug pag-edukar sa mga birtud nga anaa sa tanang tanom.