Hinaut dili kugi pinaagi sa baba

Niining tungora, kamulong milampurnas si Bagyong Ruby sa ubang mga lugar sa nasud. Mao kini ang labing kusog nga bagyo nga mihapak sa nasud karong tuiga. Apan hinay kini ikumpara kang Yolanda, ang labing kusog nga bagyo sa kasaysayan.

Ug paglurang unya ni Ruby, hinaut nga dili dako ang kadaut nga dala niini. Ug hinaut usab nga dali rang makabangon ang mga biktima niining maong klase sa trahedya nga naandan na natong bisita matag tuig.

Apan labing hinaut nga unta dali ra ang kagamhanan sa pagresponde sa mga panginahanglanon sa mga biktima ning bag-ong katalagman. Nga unta nakat-on na kini’g leksiyon sa kahinay niini pagresponde human paghapak ni Yolanda sa niaging tuig.

Matud pa sa PAGASA ug ubang international weather agencies, usa ka kusog nga bagyo si Ruby nga mutadlas sa tungatungang bahin sa Pilipinas. Gumikan niini, makapaabot kita og dakong kadaut nga dala niining maong bagyo. Hinuon nangandam na ang kagamhanan. Apan kun unsa ka andam, agta ra ang nasayud. Starring si Presidente Benigno Aquino nga maoy nanguna sa press conference sa nangaging mga adlaw alang sa preparasyon batok sa bagyo.

Present si DILG Secretary Mar Roxas ug ubang government officials sa maong press conference. Ug usa sa nahisgutan mao ang pagpangandam sa mga local government units batok sa maong bagyo, butang nga dakong kulang human milapdos si Yolanda.

Bisan pa man niini, dili na usab nato kalikayan ang grabeng binasulay tali sa mga nasyonal ug lokal nga opisyal panahon unya sa rehabilitation efforts. Ato na kining nasinati sa nakalabay nga mga trahedya.

Dili ba nga dali kaayong mag-alboroto ang nasyonal nga kagamhanan pagsud-ong sa hinay nga recovery efforts sa mga LGUs? Apan mao lagi, mag-agad lamang usab ang mga LGUs sa pondo gikan sa national government. Ug kun madugay man ang rehabilitation drive, usa usab sa mabasol ang central government.

  Apan hinaut nga nakat-on na kita’g leksiyon gikan sa nangaging trahedya diin daghang kinabuhi ang nakalas ug dagkong kabtangan ang napildi gumikan sa wala’y klarong aksiyon gikan sa kagamhanan. Hinaut nga dili baba maoy kugi gikan sa nasyonal ug lokal nga kagamhanan panahon unya sa recovery drive.