Naunay sa tari ang usa ka kawani sa Cebu City Hall diha’ng nabiktima kini sa pagpangatake sa tawo nga nalisoan sa maayo’ng pangisip nga padayong naglaruy-laroy sa kadalanan sa dakbayan sa Sugbo.
Gilabay’g bato sa usa ka tawo nga nalisoan sa maayo’ng pangisip ang kotse nga gisakyan sa mao’ng kawani sa City Hall pag-agi niini sa eskena D. Jakosalem ug V. Gullas Street kagahapon sa buntag.
Sila nga mga opisyal ug kawani sa City Hall ang angay’ng mohipos sa mga tawo nga may apan sa panglawas sama sa nalisoan sa pangisip gikan diha sa publiko nga mga lugar.
Apan makita nimo nga daghan gihapong mga tawo nga wala sa husto nga pangisip ang anaa magsuroy-suroy ug matulog sa mga aseras.
Kun kadto’ng tawo nga milabay’g bato sa sakyanan sa kawani sa City Hall kagahapon gihipos pa unta sa mga hingtungdan, dili unta kadto makahimo og kadaut.