Nangabulgar karon ang kaso sa mga proyekto nga gipaburot ang presyo ug ang labing dako niini mao ang naglambigit ni Bise Presidente Jejomar Binay kabahin sa gipatukod nga Makati City parking building dihang siya pa ang mayor sa Makati.
Karong bag-o si Senate President Franklin Drilon na usab ang imbestigahan tungod sa matud pa gipaburot gihapon nga kantidad sa proyekto. Giingon nga gipaburot ang kantidad sa pagpatukod sa Iloilo Convention Center nga gigastohan sa pundo gikan sa disbursement acceleration program.
Pero sa wala pa kining giingong pinaburot nga proyekto ni Binay, may nauna pa niini ug kini mao ang computer nga proyekto ni kanhi mayor ug kongresista Arturo "Boy" Radaza sa dakbayan sa Lapu-Lapu nga gibulgar sa magpapatigayon nga si Efrain Pelaez Jr. kaniadtong tuig 2005.
Sigun sa resulta sa imbestigasyon nga gihimo sa buhatan sa Ombudsman Visayas nasuta nga ang kapin 400 ka mga computer units nga gipang-apud-apod ni Boy Radaza nga nagkantidad og P49 mil anaa lang diay kini sa kantidad nga tag P23 mil ang matag usa. Tungod niini nag-atubang karon og kaso sa Sandiganbayan si Boy Radaza ug ang lain pang 19 ka opisyal sa dakbayan sa Lapu-Lapu.
Ang mga proyekto nga gipaburot ang presyo dili na bag-o kanato tungod kay kadaghan na kini mahitabo. Kun ngano’ng nagsige pa gihapon kini bisan sa kahigpit sa mga balaud nga nagdili niini mao kini ang dako’ng pangutana. Seguro nahimo na kining kultura sa mga opisyal sa gobiyerno nga naanad na sa ilang gibuhat.