Sam-ang sa Carreta, Dakbayan sa Sugbo--Usa sa talagsaong mga transaksiyon nga gisudlan sa Cebu Metropolitan Cathedral sa pagduma sa labing dakong bahin ning labing dakong menteryo sa Sugbo mao ang P35,000 nga kontrata pagsawod ug pagtigom sa tinonelada nga tinu sa kandila sa dakong krus dinhi.
Matag biya sa mga lubnganan sa atong mga minahal sa kinabuhi sanapan ta sa kabalaka, nga sumpayan sa malinawong pagtahan nga wa tay mahimo paghunong sa unsa nay naandan, nga may mosunod paghipos sa tanang wa pa maupos nga mga kandila aron nga himuon na sang laing mga kandila. Wa diay makaikyas sa atensiyon sa mga tagduma sa menteryo kining maong patigayon.
* * *
Ang dakong krus sa matag menteryo maoy dangpan sa mga mangalagkalag nga, tungod sa panginabuhi o kalayo na sa ilang napadparan, di nang kapauli sa ilang mga lalawigan ug kalungsoran sa mga adlaw sa mga Santos ug mga minatay. O sa mga tagtungod sa mga biktima sa krimen o katalagman nga ang mga patay’ng lawas wa igkita.
Ang dakong krus dinhi, sama sa ubang menteryo, maoy gipunsisokan sa labing daghan ug maoy labing hayag ug labing init. Ang mga managkot di gani paduolon pag-ayo aron nga di mameligro sa higanteng silaob. Magtiayon ang nakakuha sa kontrata pagduma sa dakong krus dinhi.
* * *
Dul-an sa duha ka metro ang gilapdon sa dagkotanan sa mga kandila, gisangga og pino nga alambre ug gisawogan og lawom nga tangke nga himabaw ang tubig. Ang tanang tinu sa mga kandila masawod sa bugnaw’ng tubig, mabugnaw ug mogahi.
Matag tunga sa oras, kahigon sa bana ang nagbagtok ug nanglutaw’ng kandila paingon sa daplin diin nag-atang ang iyang asawa nga nag-andam og sapyaw (hinimo sa tabon sa electric fan) ug mo-anam-anam pagpuno sa giandam nilang basiyo nga mga sako. Ang mga sinakong kandila ikarga nila og motorsiklo ug dad-on paingon sa suki nilang junk shop. Nga mao nay manghimo og kandila ug ubang mga produkto.
* * *
Magsugod pagdaghan ang mga managkot sa dakong krus sa Oktubre 28. Ang kinabag-an managkot sa Oktubre 31 ug Nobiyembre 1 ug 2. Labihan kadaghan sa mga kandila nga ang kayo moulbo tupong sa kinatumyan sa dakong krus, lima ka metro gikan sa yuta.
May pito ka kaabag ang magtiayon tungod sa kadaghan sa mga tinu sa kandila. Mahalinan sila og hangtod P50,000, busa igo gyong ginansiya human mabayran ang ilang obligasyon sa Cathedral. Nipadayag hinuon og kabalaka ang magtiayon tungod sa pasidaan sa Pagasa nga mahimong uwanon sa Kalagkalag tungod sa pagsud sa low pressure area (LPA) sa Philippine Area of Responsibility (PAR). Matud nila kun mag-uwan, momenos ang mga moduaw sa menteryo ug ang mga managkot sa dakong krus.