Dear Atty. Divine,
Gibiyaan ko sa akong bana diha’ng 7-anyos pa ang among anak. Ang iyang rason nga kinahanglan siya’ng mouli sa Mindanao kay adto siya manarbaho ug iya mi’ng gibilin sa balay sa akong mga ginikanan dinhi sa Cebu. Pagsugod, nagpadala pa siya og kuwarta apan human sa duha ka tuig wala na siya magpadala ug wala na mi communication. Karon ang among anak 15-anyos na ug iyang nakit-an sa Facebook ang hulagway sa iyang papa uban sa hulagway sa iyang tulo ka anak ug kapuyo kay naa na diay siya’y laing pamilya didto. Tungod sa iyang gibuhat nagplano ko pagpasaka og kaso batok sa akong bana kay kasal mi unya buhi pa gani ko iya na ko nga giilisan ug iya pa g’yud gipasagdan ang among anak ug wa suportahe. Unsa may una nako nga buhaton? Daghang salamat.-Gilda
Dear Gilda,
Tungod sa gibuhat sa imong bana nga nakigpuyo og laing babaye ug nakaanak pa g’yud og tulo bisan kun aduna siya’y legal nga asawa mahimo nimo siya’ng pasakaan og kaso’ng concubinage base sa atong balaod sa Revised Penal Code. Ang imong buhaton mao ang pagkuha daan og mga ebidensya sama sa inyo’ng marriage contract ug birth certificate sa inyo’ng anak ug ang mga hulagway niya uban sa iyang laing pamilya nga inyong nakita sa Facebook ug ang birth certificates sa iyang mga anak. Human niini imo siya’ng ipa-blotter apil na ang iyang live-in kun diin ni sila karon nagpuyo ug dayon mopasaka ka og kasong concubinage batok kanila’ng duha. Mas maayo nga imo g’yud nga pasakaan og kaso ang imong bana aron paghatag kaniya og leksyon. -Atty. Divine
Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column.