Segun sa mga kasinatian nga atong makita sa mga tawong nagmalampuson, nindot kaayo nga himuon nato silang ehemplo o sumbanan, aron usab atong masundog ang ilang gibuhat nga kita mahisama kanila. Ato kuno kining sundan:
* Pagmata pa lang sayo sa buntag, inspirado na gihan-ay ang mga plano nga buhaton anang adlawa. Dili buot nga may importante nga mataligam-an. Bisa’g tipik di motugot nga matibhangan. Kay giisip niya kining daku nga kakulangan.
* Kanunay may panahon sa iyang mga personal nga kalamboan. Permi adunay oras bisa’g hagip-ot o apiki, makahimo pa pag-monitor sa uban pang lain niyang inadlaw nga gimbuhaton. Maayong modumala sa iyang kaakohan.
* Adunay panahon sa pag-ehersisyo, nga bisan sa pagtuman o paglihok sa iyang gimbuhaton, may gihimong paagi nga maisip niya kini nga ingon sa nag-ehersisyo. Aron mohimso’g permi ang pisikal ug ang iyang panghunahuna.
* Mosayo sa pagtambong sa trabaho, sa mga skedyul sa meeting. May igo silang panahon nga di magkarakara sa pagdinalidali, nga nakaandam permi sa maong mga situwasyon. Dili gusto nga maulahi sa unsa man nga tambongan.
* Mahiligon sa pagpangimbestigar, mamugnaon sa ideya o konsepto. May inisyatibo sa mga butang buot buhaton ug pagtampo sa unsa mang mga katilingbanon nga kalihokan. Apil na ang pamilya nga malipayon gikauban.
* Mapasalamaton ug maabiabihon sa isig katawo, nga giisip niyang mga instrument nga katabang sa iyang naabot nga kalampusan sa kinabuhi.
* Mainampoon sa kahitas-an, kanunay nga nagpasalamat sa tanang mga grasya nga iyang nadawat pinaagi sa pagtabang sa ubang nanginahanglan.
* Di malimot sa pagsalmot o nagpakabana permi sa iyang kaakohan, sa unsa mang kalihokan nga may kalambigitan sa espirituwal. May inisyatibo nga pangunahan ug ipatigbabaw ang buluhaton nga makapahimaya sa Dios.
Hinuon, adunay pipila nga gitugahan sa Dios og maayong kapalaran, apan ingon sa nalimot sa gigikanan sa tanang butang nga iyang naangkon. Ang mga buhat sukwahe sa pagkamatarong, nahisama sa hakog nga wa lantawa pagbalik ang kanhi niyang pagkauyamot, nga piniko ang tuhod, nangaliyupo sa kahitas-an. Apan sagad nila, gibawian nas katigayonan, gipaantos nga wala pakatulga.