CEBU, Philippines- Hilabihan nga lipaya niadto’ng mga pari nga nagminyo diha nga gibutyag ni Pope Francis nga pangitaan niya’g sulbad ang isyu sa celibacy sa Simbahan.
Mi-react dayon sila ug malaumon nga ilibkas na sa Simbahan ang pagdili pagminyo sa kaparian. Sa Iloilo ang tulo ka pari nga nagminyo, ang usa kinasal g’yud nga nagsul-ob pa sa sotana, ang duha puyo-puyo lang, pulos duna nay mga anak. Giingon nga nagtukod og kaugalingong pundok, ug padayon nga nagtuman sa katungdanan sa pagka-pari, sama sa pagsaulog sa Santos nga Misa, pagbunyag, pagkompisal, ug uban pa. Anyway, mag-imagine kita kun tugotan na nga magminyo ang mga pari. Unsay mahitabo? Sa uso karon nga team ministry (alang nako, dili ni mosaler kanato’ng mga Pilipino), ibutang ta nga duna’y tulo ka pari ang usa ka parokya, kun magminyo ang tulo, tulo na ka magtiayon ang magpuyo sa kombento, gawas sa ilang mga maid ug boy, mga driver, mga yaya, ug labandera?
Mapuno na unya ang kombento ug simbahan sa daghang mga hinayhay. Unya, kun ang tulo ka pamilya, manganak man g’yud, ibutang ta nga tag-tulo lang ang ilang anak, (which could be more), siyam na ka bata ang magsuroy-suroy ug magduwaduwa sa kombento, ug lagmit sa altar samtang mag-misa ang ilang daddy?
Ug kun ang ilang mga first ladies pulos maldita, dili magkasabot, kasamok sa kombento no? Ug kun mag-ilogay kinsa ang modawat ug mohipos sa kolekta, unsaon na lang! Ug kun under-the-saya, o under-the-sotana ang mga banang pari, lagmit ang ilang mga asawa maoy mangunay pangolekta. Kun magbinalhinay na, lakip ang tibuok pamilya ibalhin g’yud. Dili ‘sab mosugot ang ilang mga asawa ug mga anak nga ibilin. Gawas pa, magduda unya ang selosa nila’ng mga asawa nga tingali’g mangabit unya ang ilang bana didto sa laing parokya.
These are some of the possibilities (remote man tingali) nga maoy mahitabo kun paminyoon na ang mga pari. Hinuon, kun wagtangon na ang celibacy, daghan na unya ang gustong magpari.
* * *
Usa sa dako’ng hinungdan ngano nga mora’g walay kasulbaran kining atong problema sa traffic, mao ang ka-lax pagpatuman sa mga balaud sa kadalanan. Maoy hinungdan nga nagsalig lang ang mga drayber. Kun estrikto lang nga ipatuman ang mga traffic laws ug dakpon g’yud ang mga violators, motagam g’yud ang mga drayber, ug maahat ka-disiplina.
Unsay nahitabo karon? Hapit tanang violations atong gi-tolerate. Ok lang mag-park bisa’g asa, Ok lang dili magsuga sa gabii, Ok lang mag-pickup ug magpakanaug sa pasahero bisa’g asa, Ok lang magsaba-saba ug magpahaguros ang mga motorsiklo ug dili mag-helmet ang driver, Ok lang magpasakay og tulo hangtud lima ka pasahero ang usa ka motorcyclist. Ok lang nga dili magsuga magabii ang mga tri-sikad, Ok lang mo-right-turn, o left-turn sa mga dapit nga gidili unta ni, Ok lang nga di mosubay sa hustong lane, Ok lang nga atong kadalanan himoong loading ug unloading lane sa mga kompaniya sa softdrinks, ug himoong luna sa vulcanizing ug wash-ur-car services.
Ang ayuda sa mga single parent
Bida karon ang mga solo parent kay duha ka balaudnon ang gisugyot sa nasudnon ug lokal nga kagamhanan.
Sa ubos balay-balauranan gisugyot nila ni Kongresista Gloria Macapagal Arroyo ug Datu Arroyo ang balaudnon nga naghatag og 10 porsiento nga diskuwento sa mga sinena sa bata ug 15 porsiento sa gatas ug pagkaon ug uban pa sa unang duha ka tuig sa bata.
Sa konseho sa dakbayan sa Sugbo, gisugyot usab ni Konsehal Gerardo Carillo ang ordinansahon nga magpahatag og P5 mil nga financial assistance matag tuig sa matag single parent.
Ang nahisgotang ordinansahon nga gipasar na sa City Council wala uyoni ni Mayor Mike Rama busa iya kining gi-veto apan gi-override sa konseho ang veto power sa mayor.
Ang veto, gahom kini sa mayor nga gihatag pinaagi sa Local Government Code, nga mahimo niya nga dili uyonan ang ordinansahon ug mga resolusyon nga ipalabang sa konseho.
Apan kining maong gahom mahimong ibaliwala lang sa konseho pinaagi sa pag-override sa veto power kun ang 2/3 nga gidaghanon sa mga konsehal mobotar nga dili hatagan og bili ang pag-veto sa mayor.
Seguro kay gi-override sa konseho sa dakbayan sa Sugbo ang pag- veto ni Mayor Rama sa financial assistance sa mga solo parent, ilang nakita nga importante ug gikinahanglan na gayud ang paghatag og ayuda kanila.
Pero kun kamo ang pangutan-on, gikinahanglan na ba?
* * *
Ang Tabang Alang sa Maayong Alagad (TAMA) sa Barangay Quiot, Cebu City magpasalamat sa Supreme Student Government sa Southwestern University (SWU) ug sa iyang mga opisyal pinangulohan sa ilang presidente nga si Jose Sayson ug bise presidente Melvin Alson sa ilang makabusog nga feeding program ug libreng tupi diin sobra sa 200 ka bata nga anak sa mga sakop sa TAMA ang nangabusog. Kaninyong tanan daghang salamat.