Karon naklaro na nga ang liderato sa Dakbayan sa Sugbo diay ang ganahan nga aregluhon na lang ang misteryuso nga pagkahanaw sa mga kahoy sa Sergio Osmeña Road sa North Reclamation Area. Mao diay nga bisan sila ang tinuod nga tag-iya sa 79 ka punoan sa kahoy nga kalit lang nawa gikan sa center island sa gisemento nga dan:
Wa subaya ang mga ebidensiya kinsa’y responsable sa pagpangibot ug pagpangawat sa mga kahoy;
Wa pangitaa ang mga kahoy aron madali pagbalhin og tanom sa di pa hingpit nga mangalaya ug mangamatay; ug wa motabang pagpalig-on sa mga kasong giandam sa Department of Environment and Natural Resources (DENR) batok sa mga niluba sa ilang kahoy.
* * *
Nabisto ang tinuod nga baruganan sa buhatan ni Mayor Mike Rama sa pagkumpisal ni Dr. Librado Macaraya, tsirman sa Parks and Playground Commission (PPC), atubang sa Cebu City Council nga palabihon niyang ilisan na lang ang mga kahoy kay sa may ipasaka pa nga mga kaso.
Nitakdo ang sulti ni Macaraya sa tanyag sa WT Construction Inc., ang kontraktor sa pagsemento sa Sergio Osmeña Road nga maoy gipasanginlan nga nikawat sa mga kahoy. Ambot nganong managsama ang ilang baruganan. Hinaot nga wa sila maghinunghongay samtang nagkapuliki ang kadagkoan sa DENR ug mga sakop ni Macaraya sa PPC sa pagpangita sa mga kahoy.
* * *
Niangkon nga nakigsulti dayon sa WT human nabisto ang pagkawa sa mga kahoy mao si City Administrator Lucelle Mercado. Kinsa maoy nikutlo sa panagang sa WT nga gitugotan sila sa DENR sa pagkuha sa mga kahoy. Bisan gipahibawo si Mercado nga may footage ang ilang command center nga nagpakita nga mga ekipo ug mga trabahante sa WT ang nangibot sa mga kahoy niinsistir siya nga kinahanglan pang himuon ang dugang pakisusi.
Kun wa pa kan kahibawo kinsa’y hawod sa City Hall, pahibaw-on tika nga si Mercado asawa ni Rene Mercado, ig-agaw sa mayor nga iyang gitudlong tsirman sa Metro Cebu Water District (MCWD), nga giingong maoy tinuod nga utok sa pamunoan.
* * *
Makahasol ang padayong pagtak-om ni Mayor Rama sa misteryo sa mga kahoy. Hinaot nga wa ni magkahulogan nga hingpit niyang gitahan ngadto nilang Mercado ug Macaraya ang pagduma ning maong kontrobersiya. Hinaot nga wa ni magpasabot nga gipalabi ang iyang interes sa politika ug ang interes sa negosyo sa WT kay sa makaluluoy nga mga kahoy.
Labaw sa tanan, hinaot nga wa ni momatuod sa sibaw nga mga pagduda nga di siya maoy tinuod nga nagduma sa dakbayan. Nga samtang siya ang nagpailang mayor may laing pundok sa mga tawo nga naggawong niya unsay angay’ng buhaton. Di alang sa Sugbo ug mga Sugbuanon kun di alang sa ilang kaayuhan.