Init karon ang diskusyon kun mahimo pa ba nga ioktaba ang eleksiyon sa Sangguniang Kabataan sa Oktubre.
Kini tungod kay daghan ang misugyot nga i-postpone kini gumikan sa nagkalainlaing rason.
Apan morag apiki na kun ioktaba pa ang SK election. Usa ka bulan na lamang ug ipahigayon na kini. Morag andam na ang tanan. Hinuon, nahinaykan na nga naka-schedule ang maong piniliay uban sa barangay election. Bisan kun dili ko uyon nga ioktaba ang maong eleksiyon, wala gayud koy bilib sa direction sa kahugpongan sa mga batan-on karon.
Unsa bay nahimo sa SK sa kinatibuk-ang kalamboan sa nasud? Sulod sa 20 ka tuig nga paglawig niini, wala koy nakitang maayong kontribusyon sa SK ngadto sa atong kabataan.
Sa laktod nga pagkasulti, wala mosaler ang organisasyon sa misyon niini pagpalambo sa kabatan-onan sa nasud.
Apan kun ako ang pabut-on, mas maayong wagtangon na lamang ang SK. Wala koy nakitang rason ngano nga ipadayon pa kining maong kahugpongan.
Klarong pag-usik-usik lamang sa salapi sa katawhan ang pondo alang sa operasyon sa SK tungod sa rason nga dili gayud kini productive. Sayang ang dakong misyon nga gisangon sa kagamhanan kanila nga wala magbunga og dakong kaayohan sa mga batan-on.