Sogod, Cebu
Kanunay na kitang makadungog nga kuno kinahanglang mohatag kita’g hilom nga pagsuhol ngadto sa sinaligang empleyado sa ahensiya sa gobiyerno kun duna kita’y transaksiyon nga himuon aron madali kini sa paglusot.
Gani mora’g usa na man kini ka tradisyon. Anguban mitawag niini og “under the table.†Ug sumala sa survey sa National Statistics Office (NSO), namatud-an nga tinuod gayod diay kining maong anomaliya. Matud sa NSO, upat sa napulo ka mga Pilipino ang nagbuhat niini ngadto sa gisaligang empleyado sa ahensiya sa gobiyerno nga giduol aron maatiman dayon ug mapalusot ang giduol niyang transaksiyon.
Pastilan diay, no. Dagko na og suweldo ug benepisyo ang mga empleyado karon sa gobiyerno apan modawat diay gihapon ang uban og suhol o under the table. Pagkadakong tamparos niini sa slogan ni Presidente Noynoy Aquino nga “daan na matuwid.â€
Mao nga tungod sa maong uwahing survey nga gipahigayon sa NSO, naalarma ang Malakanyang. Gipasabot ni Deputy Presidential Spokesperson Abigail Valte nga nahisupak sa paglimpyo sa gobiyerno gikan sa hugaw nga binuhatan kining maong gihimo sa ubang empleyado sa kagamhanan nga modawat og hilom nga suhol gikan sa Pilipino nga naghimog transaksiyon.
Husto kaayo kini. Samtang ang gobiyerno ni Noynoy naningkamot sa pagsanta sa graft and corruption sulod sa iyang pagdumala, apan ang uban diay nga empleyado sa gobiyerno hilom nga nagguba sa kagustohan sa presidente.
Angay lang gayud nga mabalaka niini ang gobiyerno karon, kay ang maong matang sa empleyado maoy anay nga nagkutkot sa kaligdong sa panggobiyerno ni Noynoy. Tungod niini, gidasig sa Malakanyang ang mga tawo nga mosumbong sa sinaligang ahensiya sa gobiyerno nga motul-id niining maong mga binuang sa ubang mga empleyado sa kagamhanan o kaha ngadto sa opisina sa Ombudsman.
Dili angay konsintehon kining maong matang sa pagpangguwarta sa ubang empleyado sa gobiyerno.