Ina kay kondinahon, ina kay ikauwaw, ina kay silotan, giagak ug gitabangan sa University of San Jose Recoletos ang ilang tinun-an kansang sex video nahimong viral dinhi sa Sugbo. Tungod niini, akong ipaabot ngadto sa kadagkoan sa unibersidad ang akong pagsaludo sa nahimo nilang hukom.
Ang tinun-an biktima sa mga tawong sungayan ug ikogan nga walay mangalingaw gawas sa pagpanghilabot sa pribadong kinabuhi sa uban. Busa angayan lamang siyang tabangan ug suportahan sa tunghaan nga napagan.
Sa nahimong hukom sa University of San Jose Recoletos gipakita lamang niini ngadto sa katawhan ug sociedad ang kalapad sa ilang kasing-kasing ug pagsabot sa ilang tinun-an kansang bansagon gibugalbugalan ug gipistahan niadtong mga hangol ug matud pa ni Dr. Rene Obra, hepe sa Department of Behavioral Sciences sa Vicente Sotto Memorial Medical Center nga dili mga normal.
Sa Josenian family ug sa ilang mga kaparian dawata ang akong pagyukbo ug pagsaludo ninyo.
Sa gipakita nga kalapad sa kasingkasing sa mga pari ug kadagkoan sa University of San Jose Recoletos ngadto sa ilang tinun-an, mapanaminan ug mahimo untang panag-ingnan sa mga madre sa Saint Theresa’s College.
Ang sex video nga mikatap daw virus usa kini ka testing nga kaso sa balaud nga Anti-photo, Video ug Voleurism nga gipalabang niadtong tuig 2009 agi’g tubag sa kongreso ug gobyerno sa nahitabo nila ni Katrina Halili, Maricar Reyes ug Hayden Kho.
Dinhi matestingi ang balaud kun may ngipon ba kining makapamaak sa mga tawong gipunting ug gigukod.