Kaniadto pa ato nang nasayran nga dunay mga kahugpungan nga nagpakabana isip katilingbanong kaakohan, dili lang sa atoa kundili hasta usab sa tagalaing nasud. Nangolekta kini sa komunidad ug mga donasyon o hinabang alang sa mga biktima sa grabeng kalamidad sama sa linog, bagyo, lunop, ug uban pa.
Kadtong mga binandol nga bisti nga ipanghatag gikan sa laing nasod, gitawag kana kaniadto og RELIEF kay derikta man kining ipanghatag sa mga hingtungdan. Mahadlok gani ta mosul-ob kay ginamit na man kini sa nagdonar basig may kagaw. Apan karon ginganlan na kinig UKAY-UKAY, nga daghan na kaayong makitang gipangladlad sa aseras ug tindahan. Kun gusto ka mopalit, imo pang ukay-akayon. Usahay makapili kag nindot nga imported ug barato pa.
Apan duna tay nabasahan nga usa ka asul nga karsones nga ginamit na. Haskang bulingona kay may lama na sa hugaw sa lubotan o buganan. Kay sukad gigamit kini sa namatay niadtong tuig 1977 wa pa gyud kini kalabhi. Unya karon gisubasta o gibaligya na nga grabe pod kamahal ang presyo. May mopalit na unta sa kantidad nga 8000 dolyares apan wa itugot. Hinoon, matud pa sa nagsubasta kun dunay moapas sa kantidad 11,200 dolyares, mahimo na kini nga ihatag. Kun sa atong kwarta, kini mobalor kapin kun kulang 400,000 ka pesos.
Sa mga tawo mahilig sa mga koleksyons, mopalit kini nga di moila kun unsa kamahal basta maangkon nila ang butang gitoohan nilang bililhong handumanan sa mga gamit personal sa inila o nabantog nga tawo sa tibuok kalibutan. Sama ni anhing Elvis Presly nga misikat pag-ayo tungod sa iyang lahing istilo sa sayaw ug kanta, nga maoy tag-iya sa kinamahalang ukay-kay nga karsones sa England.