Dear Tito Miguel
Ako diay si Kate. Ang akong problema is about sa akong uyab. Sa una seryoso pa siya nako, nagkadugay na among relasyon anha pami nagsige'g away, wala man unta koy sala niya siya ray ni kalit og kasuko nako.
Unya niingon dayon siya nako og kalit nga buwag na wa nay daghang estorya. Mao to na shock ko sa iyang giingon. Pagka-ugma nisulti iyang amigo nako nga aduna kunoy laing babaye akong uyab.
So sakitan sad ko kay naa diay siya'y lain maong nakigbuwag og largo. Magsige na lang ko'g hilak sa kuwarto tungod sa kaguol nga ako na lang usa ug wa nay nagmahal nako. Tambagi ko palihug. Unsa may akong buhaton aron dili na siya mosulod sa akong hunahuna? Unsaon nako aron makalimtan na siya? —Kate
Kate,
Arang-arang kay imong gusto buhaton unsaon nga siya hingpit malimtan. Buot pasabot di ka mogukod sa tawo nga nagluib kanimo. Diha pa lang daan, nitikang na ka sa primerong lakang.
Dili mapugos nga siya imong malimtan dayon inig mata ugma o sunod adlaw. Palabya usa ang panahon, kalit ra na siya mahanaw sa panumdoman, kinahanglan ka moagi’g proseso.
Samtang naa pa siya sa imong hunahuna, hinumdomi ang nindot ug tam-is nga bahin sa inyong relasyon aron dili ka mahimong bitter. Apan kay lisod man kalimtan iyang gihimo, gamita kini nga pahimangno. Inay nga anugnan ka sa iyang pagkawala, pagpasalamat nga samtang sayo pa, nasuta nimo unsa ang matang sa iyang pagkatawo.
Ang imong paghilak ug pagtuo nga wala’y laing nagmahal kanimo natural nga bation sa giilad. Lagmit nagself-pity ka, nangutana unsay sayop o kuwang nimo ngano kalit man ka giilisan. Wala’y kuwang nimo, ang imong uyab maoy subra kay wa ma kuntento sa usa. Kun ugaling duna man kay kuwang, dili igo iyang gugma modawat o mopuno niini.
Inay nga maghunahuna ka unsa unta imong nahimo aron di siya mobiya, paghinam-hinam sa umaabot nga tawo nga dunay igong katakos mopalig-on sa imong kahuyang, motul-id sa imong kahiwian ug mokumpleto sa imong kakuwangan, dili kay tungod sa gamay nga bikil mokalit la’g balhin ngadto sa lain.
In the meantime, focus on the love that is constant. Sama sa pagmahal sa imong ginikanan ug pamilya. Dangop sa imong mga higala aron duna kay mapagawsan sa imong gibati hangtod nga mohilak ka dayo’g mokatawa. Usahay gani magdungan ang duha. Simang apan kinahanglan aron ang tul-id nga dalan imong matultolan.
Kasagaran uyab igo ra mohatag nimo’g leksiyon sa gugma ug kinabuhi hangtod imong makaplagan ang gitagana. Kadto imong uyab usa lamang ka leksiyon kanimo mopalig-on. Pait sa sugod, tam-is sa sunod. Inig abot sa adlaw, tab-ang na ang tanan nimong giagian, lagmit gani wa na kay madumdoman unsa to imong natilawan, labi na kun duna nay lain sa imong kiliran. —Tito Miguel