Didal, Watanabe flag bearers sa SEAG

CEBU, Philippines — Dili lang usa, apan duha ka Cebuana athletes ang napiling flag bearers atol unya sa opening ceremony sa 30th Southeast Asian Games karong Nobiyembre 30 didto sa Philippine Arena. 

Ang Asian Games gold medalist sa skateboarding nga si Margielyn Didal ug Fil-Japanese judoka nga si Kiyome Watanabe mao ang duha sa unom ka mga flag bearers sa Philippine team nga laraw mosakmit sa top three place sa maong multi-sporting events.

Gawas sa duha, anaa usab si Olympics silver medalist Hidilyn Diaz, boxers Eumir Marcial ug Nesthy Petecio ug pole vaulter EJ Obiena.

Ang gymnast nga si Carlos Yulo, kinsa bag-o lang misakmit og bulawan sa World Championship, mao ang torch bearer sa maong engrandeng seremonya.

Sila si Didal ug Watanabe mao unta ang torch relay bearer karong Nobiyembre 16 sa pag-abot sa SEA Games torch sa Sugbo, apan dili kalugar ang duha nga pulos nag-ensayo gawas sa nasud.

Tungod niini, ang PBA MVP nga si JuneMar Fajardo ang gilauman nga mangulo sa maong seremonyas.

Motambong hinuon ang duha ka Cebuano athletes nga moduwa sa SEA Games nga sila si triathlete Kim Remolino ug Fil-Japanese Sarah Pangilinan sa karate.