Bibliya ug balaod

Alas sayis y medya sa kilumkilom. Agosto 27, bisperas sa piyesta sa lungsod sa Carmen. Tayming ang pag-abot ni Rudy sulod sa kinoral nga nataran sa panimalay ni Glen, ig-agaw ni Mira, kapikas ni Rudy. Nag-abot sila sa gate ni Glen nga bag-ong nauli gikang nisimba. Birthday niya karong adlawa. Aron makadaginot, ang iyang hikay sa birthday, mao ra sab ang hikay sa piyesta. Customs broker si Glen. Si Mira wa kakuyog kay bisi na sa mga preparasyon sa piyesta.

Suod sila si Rudy ug Glen kay ang nauna, usa ka  CPA ug maoy kasagarang makunsulta ni Glen mahitungod sa mga papeles kalabot sa buhisan, sama sa financial statement ug income statement. Wa nakontento sa iyang pagka-CPA si Rudy. Nagtuon sa Bibliya ug balaod.

Gia-abi dayon ni Glen si Rudy. Gidawat, ug gipasalamatan si Rudy sa iyang regalo nga usa ka botelyang red wine. Gipalingkod niya si Rudy tupad ni Engr. Edwin Salico nga taga-Baring nga nauna’g diyutay og abot ni Rudy. Pareho silang naglakaw padulong sa balay ni Glen nga nahimutang sa Poblasyon, duol sa merkado. Ang balay ni Rudy tua sa baryo Picas.

Samtang nagkolokabildo sila’s Edwin ug Rudy, may nangabot nga upat ka tawo. Duha ka tiguwang babaye’g lalaki. Ug duha sab ka batan-ong babaye’g lalaki. Mora’g tibuok pamilya. Mga lago. Mora’g mga makililimos. “Maayong piyesta! Pakan-a mi!” matud sa tiguwang babaye. “Dili pa ni piyesta akong hikay. Ugma pa man ang piyesta”, ni Glen nga nagsira gate. “Tagai lang mi’g kuwarta, sir!” matud sa tiguwang babaye. Wa gyud naminaw si Glen.

Wa kaagwanta si Rudy sa iyang nasaksihan. Nitindog siya. Nikuot sa iyang  pitaka og P 50  ug gitunol sa babaye. Ayaw na’g tagai Rud. Kay maanad!” ni Glen pagkakita sa gibuhat ni Rudy. “ Magbalikbalik gyud unya na sila!” timang ni Edwin. “Nagtuon man sab gud ko’g Bibliya. Nabasa man nako ang pulong ni JesuCristo nga nag-ingon, ang inyong gibuhat sa labing ubos kaninyo, gibuhat ninyo Kanako!” ni Rudy. Dayong lingkod og balik. Nitak-om ang mga baba nilang Glen ug Edwin.