Ayo! Matud sa tiguwang babaye atubangan sa tindahan ni Titang sa merkado sa Carmen. "Oy nia na man sab ning babayeng tagabukid og nawong," tuaw ni Titang sa hilom nga may dalang kairita, kay naestorbo iyang pagkumpiyot og masyaw.
"Unsay ato, nang? Ni Titang, napugos og tagad sa tiguwang. "Gipauli sa akong amo ning gatas ebaporada imong gibaligya nako tayaon na ang lata. Di na gani mabasa kun kanus-a ni-expire mao diay'ng imong giputos ug aron di nako makita nga tayaon!" Sa tiguwang nga nagtunol ngadtong Titang sa lata sa gatas. Nakapanglab-ok og laway si Titang.
Hapit na mabangkaruta iyang sarisari nga tindahan, wa na siya'y ikapangumpra og bag-ong stocks. Old stocks na ning iyang gipamaligya. Kadaghan na siya ulii sa mga pumapalit. Daghan na nga mga suki niya nga nitagam ug wa na nipalit sa iyang tinda. Tungod sa bisyo niya sa masyaw hapit na mahapay iyang tinda.
Sa iyang tan-aw ignorante, tanga ug tagabukid ang tiguwang nipalit og gatas ganihang alas sayis sa buntag. Gihatagan niya'g gatas sa tayaon nga lata nga dugay nang ni-expire. Dangtag usa ka oras, nibalik ang tiguwang.
"Natural ra man nga tay-an kay lata gud na!" ni Titang kay way gustong modawat sa giuli, way ikailis. "Kun di nimo ilisan, bawion nako ang akong gibayad. Sugo sa akong amo, sinugo ra baya ko," sa tiguwang. "No return, no exchange akong palisiya sa tindahan," ni Titang nagpabaga sa nawong. "Abogado baya akong amo nga nisugo nako basig makiha ka'g dili oras!" Sa tiguwang. Nangluspad ug gikulbaan si Titang sa iyang nadungog, napugos og dawat sa giuli ug giuli niya sa tiguwang ang kuwartang gibayad. "Wa man ka magsulti dayon nga abogado diay imong amo," ni Titang nikanga.
"Diyos ra ang makaubos og tan-aw sa tawo busa dili ko nimo angay ilaron bisa'g sa imong tan-aw ignorante, tanga ug tagabukid ko'g nawong," sa tiguwang dayong talikod. Daw natuk-an si Titang sa iyang laway. (Kataposan)