Lahi ang rota nga gi-hike ni Rudy karong hapona. Duna siya’y higala nga gustong duawon kay nasakit. Gipangita niya ang balay ni Lino nga sa iyang nasayran naa sa relocation site sa barangay Baring.
“Gaw!” Nakadungog siya’g laghaw nga tingog dapit sa iyang luyo. Tungod sa kasuod nila ni Lino, “Gaw” ilang tinawganay.
Magtutudlo si Rudy sa Carmen Central School, ug contributor ug sugilanon sa Banat News. Nisaad siya nga iyang ihatag ni Lino iyang makolekta nga writer’s honorarium karong bulana.
Nilingi si Rudy. “Oy! Gaw! Naa ra diay ka diha?” ni Rudy. Nagsandig si Lino sa poste duol sa silangang goal sa basketbolan. Nagbitbit og sungkod. Daling nibalik si Rudy sa agi aron duolon ang hgiala. “Maayo kay nigawas ka Gaw. Kay ikaw gyud akong tuyo. Hain man diay inyong balay?” ni Rudy. Nitudlo ni Lino sa daghang kabalayan luyo sa tunghaan.
Lisod na masabot ang sinultihan ni Lino. Sagol senyas na lang. Nguhal na kaayo. Dako og kadaut sa iyang lawas pagka-stroke niya. Lisod sab iyang paglakaw. Siya may tigtrapik kaniadto sa dalang nagkuros padulong sa central school. Gibati og tumang kalooy si Rudy sa higala. Giagbayan niya. Makita ang kahinangop sa nawong ni Lino. “Giduaw tika kay amigo god ta,” ni Rudy. Nikoot sa iyang pitaka. “Ipalit unya nig tambal ug mga sustansiya ug vitamins”, ni Rudy. Nagtunol siya sa pinilo nga tibuok usa ka libo ka pesos. Nibakho og hilak si Lino sa kalipay huma’g dawat. “Sa-la-mat-ka-ayo, Gaw”, ni Lino. Nigakos sa higala. Nagsigig bakho.
“Way sapayan, gaw. Gituman ko lang ang reklamo sa Diyos nga nag-ingon ‘nasakit ko, wa ko nimo duawa’. Ang iyang ipasabot ang isig ka tawo nga nasakit, maoy iyang ipaduaw. Dili siya, kay di man masakit ang Diyos” ni Rudy. “Sa-la-mat gyud Gaw. A-ko ubang mi-go o paryen-te, unya ra duaw kun pa-tay na ko. Ang ma-ma-tay gaw, mora’g artista.
Daghang motan-aw!” ni Lino. “Maayo pa ka gaw. Ampo lang sa Diyos, ang Diyos mobanhaw og patay. Busa ang sakit dali rang maayo basta Diyos nay magbuot”, ni Rudy.