"Pagkawala ko magdahom nga kamo ang magkadayon ang babaye nga makausa ka higayon niana akong gihigugma," matud pa ni Fr. John.
"Oo Father, siya ang babaye nga matud pa, unang babaye nga imong gihigugma ug ako usab ang tawo nga gipakasama mong mortal nga kaaway," matud pa sa lalaki.
Ang maong kaslonon mao si Marissa ug si Larry, mikatawa na lang si Fr. John, nahimuot sa nahitabo nianang adlawa. "Nalipay kaayo ko Father pagkasayod nako nga nagpari kana mao nga gihangyo ko si Larry nga ikaw ang mokasal namo," matud pa ni Marissa.
"Pagkawala ko magdahom nga kamo gyud ang magkadayon siguro gimbut-an gyud sa Ginoo nga dili ko higugmaon sa mga babaye nga akong gihigugma kay diay may plano siya para nako. May mga babaye nga nahigugma nako apan wala man sab ko mahigugma kaniadto nila. Pagkadaghan sa nahitabo sa atong kinabuhi nga dili lang nato damhon. Pero kadtong tanan, ibutang na lang nato nga parte sa atong kagahapon. History na lang to nato nga pagaisipon," matud pa ni Fr. John.
"Mao gyud Padre," ni Larry pa tuod man nangumpisal ang duruha nga kaslonon gihatagan og absolusyon ni Fr. John sila si Larry ug Marissa. Nangayo usab og pasaylo si Marissa sa mga pagpasakit niya kang Fr. John kaniadto. Nangayo usab og pasaylo si Larry kang Fr. John sa samang higayon, nangayo usab og pasaylo ang pari sa duruha sa mga dili makiangayon nga gibuhat niya kaniadto ilabi na ngadto kang Larry. Mas nahimong mabulokon ang pagkatawo karon ni Fr. John kay nakapangayo na siya'g pasaylo sa nasad-an niini--kang Larry nga kaniadto giisip niya nga maoy mortal nga kaaway. Ang tanan gipakasama na lang ni Fr. John nga mangil-ad nga urom sa iyang pagkahikatulog.
Nasayran sa pari nga may duha na diay sila ka anak si Marissa ug Larry, babaye ug lalaki. Human diay maka-graduate sa college ug nakatrabaho, gikasal sila sa huwes. Apan pangandoy gyud ni Marissa nga mopaso sa simbahan paingon sa altar. Nakadesisyon si Marissa nga magpakasal sa simbahan human masayod nga usa na ka pari si Carlo kon Fr. John. Naa magpuyo sa pikas lungsod sila si Larry.Bag-o lang silang mibalhin gikan sa siyudad kay may napalit silang property diin ang tapad niini napalit usab nila ug gihimong beach resort. Sila mismo ang nag-manage samtang si Larry wala pa mobalik sa pagpanarbaho didto sa Kuwait isip mechanical engineer. Human sa kasal gidapit nila ang pari sa ilang reception nga didto ra sab gipahigayon sa maong resort.
Nakita ni Fr John kun unsa ka malipayon si Marissa uban kang Larry ug uban sa duha nila ka mga anak. Nakaingon, 'Salamat Ginoo nga nahitabo ang mga nahitabo sa akong kinabuhi. May mga tawo nga nagmalipayon tungod sa imong gimbut-an.' Wala magdugay ang pari sa reception, mibalik kini sa parokya kay may misa pa kini.
Ang kinabuhi ni Carlo kon Fr. John, usa ka sugilanon nga makapahinuklog sa tanan ilabi na sa kabatan-onan niining bag-ong henerasyon. Ang mga pagsulay mamahimong paagi aron ang tawo mamahimong lig-on. Ang kapait mamahimo matam-is, ang mga kasakit mamahimong kamaya ug labaw sa tanan ang mga tentasyon maoy sukdanan kun unsa ka lig-on ang usa ka tawo nga binuhat sa iyang magbubuhat. Usahay dili mahibaw-an nga ang usa ka salawayon mamahimong sumbanan sa uban, sumbanan dili ang iyang pagkasalawayon kun dili ang iyang kausaban ug kaisog sa pagpakigbatok sa tanang pagsulay sa kinabuhi.
Sugilanon sa gugma sa anak ngadto sa iyang mga ginikanan. Gugma sa ginikanan ngadto sa iyang anak. Panagbangi nga may kataposan, kasilag nga may utlanan, pagdumot apan sa tago may tim-os nga pagmahal nga nagpahipi diin molugwa kini pagbalik nga dili lang damhon. Sugilanon ni Carlo kon Fr. John. Sugilanon sa iyang pagsukamod ug pagbangon, sugilanon nga nagsugod niadtong tuig mil nuve sientos nuybenta Y nueve. (1999)
Si Marissa, Sandra, Mira, Lina, Miles, Teresa ug uban pang mga babaye nga nalambigit sa kinabuhi ni Carlo mao ang gitawag og 'Ang Mga Eba Sa Paraiso ni Adan'. Karon ang mga Eba ni Carlo sa iyang Paraiso dili na ang mga Eba nga gustong ikauban diha ibabaw sa kama, kun dili mga Eba nga mao ang mga Parokyano sa Simbahan nga gialagaran ni Adan kon Fr. John o Carlo nga matawag niya nga maoy matuod nga Paraiso. Paraiso sa Yuta ug sa Langit. (End)