Bitin nga tapayan

Naglakaw si Lauro ning udtoha, nagpalit siya og lansang kay magbuhat siya'g tangkal alang sa binuhi niya'ng bantris. May nakita siya sa unahan tapok sa mga driver diin ang usa ka tawo may gitigbas nga dakong bitin. Natunga kini, ang lawas bisan naputol, nidagan gihapon. Ang ulo nipasok sa dakong lungag.

Samtang ilang gipanitan ang maong bitin nahikurat si Lauro kay ang maong bitin puwerteng daghana'g itlog sa iyang tiyan.

Human matilawi ni Lauro ang maong bitin nga adobo nipauli siya aron tiwason og panday ang tangkal. Igo sad mouli ang iyang amahan sunod buwan, modako na usab ang iyang bantris.

"Lauro, mouli na si Papa ninyo sunod buwan kamo unya'y sugat sa imong manghod ha! Kay mag-andam ko og paniudto sa iyang pag-abot" ni tiya Lydia pa niya.

Nanghupaw si Lauro, kun buhi pa lang unta si mama niya magkapundok unta sila sa iyang adlaw nga natawhan. Niabot na gayud ang gikahinaman ni Lauro, nangaligo sila sa dagat aron pagsaulog sa iyang birthday uban sa tibuok pamilya.

"Lauro, ang imong manghod ha? Atimana baya basin malumos wala pa baya moabot ang iyang pamanhonon nga si Ay-ay?" pulong pa ni papa niya nga si Trebmal.

Samtang naglangoy-langoy si Papa Trebmal niya may dagkong kapaw sa dagat nga nipaingon sa iyang amahan ug sa kalit lang nadungog nila ang ngaab sa iyang amahan. Dali nilang gitabang si papa Trebmal nila, nabantayan ni Lauro nga may dakong abhak sa dughan sa iya'ng papa, mora'g gipaak og dakong mananap. "Manoy, Lauro, patay na si papa Trebmal, wa' na tay mga ginikanan hu-hu-hu?" minatay sa iyang manghod nga si Jemai.

Unya may tiguwang nga bungoton niduol kanila, Dong isugid ko kaninyo ni'ng maong dapit usa kini ka lasang daplin sa dagat gi-develop kini sa gobiyerno aron himuong pantalan, daghang bitin nga natabunan sa pagbuldos. Ang nahitabo sa imong amahan binuhatan kato sa bitin nga tapayan nga daghan nang gipamatay, usa niana ang mahal kong asawa nga si Alma. (Kataposan)