One day millionaire
Sugilanon - Prescil I. Cañete Sr. (Banat) - November 13, 2015 - 9:00am

Usa ka buwan una makompleto ang panagsabot. Kidnapon nila ang negosyante nga si Amalia nga tag-iya og usa ka hardware sa siyudad ug mestizo Insek ang bana nga si Mr. Lee Pong.

Sila si Max, Baldo, Sabas ug Tasyo, mga adik ug wala’y trabaho maoy nagkasabot nga kidnapon nila ug ipalukat og dakong kantidad si Amalia.

Nakidnap gyud nila si Amalia ug gidala nila sa bukid. Gitagoan sa hideout. Ang bana gipangayoan nila og P1 milyon bugti sa kagawasan sa asawa.

Wa mobalibad ang Insek sa ilang gipangayo ug nagpasalig nga dili siya mosumbong sa mga tinugyanan sa balaod. Ang nagbantay kang Amalia didto sa bukid mao sila si Sabas ug Tasyo. Si Max ug si Baldo maoy nakigkita sa Insek didto sa dapit nga ilang gikasabotan.

Mabinantayon ang duha sa ilang mga lihok. Dihang nasuta nga wala’y angay kabalak-an abtik nga giduol ang Insek nga nagpaabot kanila.

“Mr. Lee Pong, andam na ba ang among gipangayo?” ni Max. “Ayaw pagdugay, Mr. Lee Pong, kay nagdali mi,” ni Baldo. Gitunol ni Mr. Lee Pong ang kuwarta nga gisulod sa gamay’ng bag. “Si Amalia, hain siya?” sa Insek.

“Ayaw kabalaka.Way tatsa imong asawa,” ni Max. Nagdali nga mipahilayo sa dapit ang duha ka kidnaper biniyaan si Mr. Lee Pong nga mitawag dayon sa buhatan sa kapolisan. Gipahibalo nga gikidnap ang iyang asawa ug nakahatag na siya’g ransom nga usa ka milyon ka pesos. Gihulagway niya si Max ug Baldo ug wala pa kini makagawas sa siyudad.

Milihok dayon ang kapulisan. Giatangan ang mga dalan nga posibleng agian sa mga kidnaper.

Sila si Max ug si Baldo mipalit og motorsiklo aron maoy sakyan padulong sa bukid. Naghaguros ang motorsiklo tadlas sa siyudad. Si Max nagmaneho; si Baldo nga nagkabiba sa bag nag-angkas.

“Bay, Baldo, one day millionaire ta karon,” ni Max nga nagngisi. Kusog ang dagan sa motorsiklo apan kalit kining mi-menor kay nalantawan ni Max ang mga polis nga nag-checkpoint.

Buot ni Max nga molikay apan gibabagan sila sa mga polis. Gipangayoan si Max og lisensiya apan wa’y gikahatag. Nakuhaan pa siya’g kalibre .45 nga pistola. Girekisa ang bag ug nakita ang daghang kuwarta. “Kamo diay ang nagkidnap sa asawa ni Mr. Lee Pong? Hain si Amalia?” matud sa lider sa mga polis.

“Tua sa bukid, sir,” tug-an ni Max. Gipasakay sila si Max ug Baldo sa patrol car aron maoy mogiya sa ilang hideout nga naghuwat sila si Sabas ug Tasyo nga dakponon sab. (Kataposan)

ACIRC AMALIA ANG BALDO INSEK MAX MGA MR. LEE PONG NGA SABAS SI MAX
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with