Dear Tita Salie,
Have a nice day. Ako diay si Japeth, taga Surigao, pero nia ko sa Bohol karon. Usa ‘sab ko sa ganahan mobasa sa mga maayong balita. Duna lang ko’y pangutana kun unsa’y buhaton aron masabtan g’yud nato ang Pulong sa Dios? Ganahan g’yud ko sa mga tawo nga hanas bahin sa Bibliya. Palihug pasabta ko.
* * *
Dear Japeth,
Aron masabtan gayud ang pulong sa Dios diha sa Bibliya, kinahanglan kining tun-an nimo’g maayo. Ang Bibliya mapuslanon gayud sa daghang paagi. Sa imong pagtuon niini, mapahimuslan nimo ang tinuod ug matagbawon nga kinabuhi. Kun imo kining tun-an, imong masabtan kun ngano nga kita nag-antos. Imong masabtan kun sa unsa nga paagi masagubang nato ang mga kabalaka sa kinabuhi.
Imong masabtan kun sa unsa’ng paagi nga atong maangkon ang mas malipayon nga pamilyahanong kinabuhi. Imo usab nga masabtan kun unsa’y mahitabo kanato kun kita mamatay na. Masabtan ‘sab nimo kun sa unsang paagi nga makita nimo pag-usab ang namatay natong mga minahal. Kining pipila ka butang nga gihisgotan masabtan kini pinaagi sa Bible study. Adunay motabang kanimo aron masabtan nimo ang tanan. - Tita Salie