Gula 16
Wala masayod si Lito kun unsay iyang isulti sa kanhi niya girlfriend nga si Grace nga gikahinagbo niya sa SM. “Kumusta ka na Lito? Dugay na nga wala ta magkita,” matud ni Grace.
“Okay lang. Ikaw, kumusta?” bawos pangutana ni Lito sa kanhi niya girlfriend. Mapagarbohon kaayo si Grace. “Aw dia, malipayon kaayo kay ang lalaki nga akong gipuli nimo human tika gibuwagan, kuwartahan man, daku kaayo’g sweldo. Executive siya sa dako’ng kompaniya dinhi sa siyudad.”
Taud-taod, may tawo nga miabot nga gikan sa direksyon sa likud ni Lito. Gisugat kini og kiss ni Grace dayon gipaila-ila kang Lito.
“Mao kini ang akong sweetheart, ang giingon nako nga executive sa dako’ng kompaniya ug dako kaayo’g sweldo. Nagplano na kami nga magpakasal,” mura’g gipasuya ni Grace si Lito.
Igo lang milingi og kadiyot si Lito ngadto sa lalaki nga gipaila ni Grace nga iyang boyfriend ug dayon miduko.
“Sir?” gitagad si Lito sa boyfriend ni Grace. Igo lang mipahiyom si Lito. “Sige, biyaan ko usa kamo kay duna pa ko’y paliton.”
Gitug-anan si Grace sa iyang boyfriend nga si Lito mao ang tag-iya sa kompaniya nga iyang gitrabahoan.
“Buotan kaayo kadto si sir Lito. Gitug-anan ko niya sa iyang kaagi nga kaniadto may girlfriend siya nga iya g’yud nga gihigugma apan mibiya kaniya tungod sa iyang kakabos. Karon, kuwartahan na kaayo si sir Lito,” matud ni Mark.
Mura’g nahimong kandila si Grace nga nagbarug samtang naglantaw sa bayhon ni Lito nga nagkalayo. Wala danti’g dugay, gibiyaan ra si Grace ni Mark. (Katapusan)