Dear Tita Salie,
Hi! Good day. Ako si Aurora taga Daanbantayan, Cebu, minyo ug naay mga anak. Ang akong problema parti kini sa akong pagkatawo. Duna man gud ko’y deperensiya, bungi ko daan sukad pa sa akong pagkabata. Wala g’yud ko’y kalipay, Tita Salie. Ug mura’g ikaulaw ko sa akong bana, talagsa ra g’yud mi magkuyog. Palihug pasabta ko unsa’y akong buhaton aron mahupay ang akong gibati.
Maayong adlaw Aurora,
Kita’ng tanan aduna’y deperensiya, pero sa diha nga gikasal na, gipakaslan nato ang usa’g-usa tungod sa gugma, dili ang deperensiya. Seguro mibati ka og kahingawa tungod sa imong depekto. Hatagi og kumpiyansa ang imong kaugalingon. Abi nimo, Aurora, ang tawo nga hitsuraan mahimo’ng mobati nga siya maot o ang tawo nga dili kaayo hitsuraan mahimo nga mobati siya nga siya puwerte’ng guwapaha o guwapoha. Depende kana sa tinamdan.
Ang Galacia 6:4 nag-ingon: “pasulaya ang matag usa sa iyang kaugalingong binuhatan ug niana siya may hinungdan sa pagsadya labot sa iyang kaugalingon lang ug dili sa pagtandi sa laing tawo.” Tahora ug pasagdi lang ang imong bana. Buhata ang trabaho sa usa ka asawa. - Tita Salie