Didto na lang nagpahatod si SPO1 Nicko Bernal sa ilang police station kay tua man ang iyang motorsiklo nga maoy iyang sakyan pauli sa iyang pinuy-anan sa Barangay Lundag.
Pagkaugma, nagsulti pag-usab sila si Nicko ug Chief Inspector Dindo Raval. Nagtinabangay sila sa paghuna-huna og maayo nga paagi unsaon paglukong ang mga sakop sa Bangkulis Black Brotherhood.
Nagtuo gayud sila nga kun mabungkag na ang maong kulto sa lungsod sa Tinago, masulbad na ang pagpamatay sa ilang dapit sa mga bata’ng babaye nga natawo sa Septiyembre 8.
Sa tunga-tunga sa panagsulti nila ni Nicko ug Chief Inspector Raval, mibagting ang telepono nga gipatong diha sa talad sa hepe. Gipunit dayon sa hepe ang awditibo ug gitubag ang tawag.
Apan mura’g nakugang ang hepe sa gitaho sa nanawag. Kadali ra niini nga gibutang ang telepono.
“Kinsa kadto, sir?” nangutana si Nicko.
“Ang barangay kapitan sa Maslog,” tubag sa hepe. “Nagpahibalo nga may batang babaye nga napalgang patay sa ilang dapit.”
“U-unsa?” ni Nicko pa nga nakalitan.
“Adtoa ninyo ang maong dapit karon dayon, Nicko. Susiha dayon kini’ng hitaboa. Nagtuo ko nga binuhatan na usab kini sa kulto.” (Sumpayan)