Mura’g nangurog si Elmer diha nga gidis-armahan siya sa ilang opisyal sa iyang isyu nga .45 kalibre nga pistola nga giluklok niya sa iyang hawakan.
Gikuha paglakip sa iyang opisyal ang tsapa ug ID pagka polis. “Gimando ni director nga ipaimbestigar ka sa Internal Affairs Service tungod sa pagsuway nimo pagsuborno kanako aron tabangan ang atong dinakpan,” matud sa opisyal.
“Daku ko og pagsalig nimo Elmer kay gisultihan ko sa imong opisyal nga maayo ka motrabaho, apan duna ka diay sekreto nga pakigkunsabo sa mga kontra sa balaod,” matud sa police director.
Wala motingog si Elmer. Nahinangop na lang siya kay wala rekisaha sa ilang opisyal ang iyang bulsa kay sigurado nga makit-an ang lain pa nga P150 mil nga subra sa gihatag kaniya ni Fatima nga anak sa dinakpan nila nga pusher sa Duljo-Fatima.
Paggawas nila sa opisina sa police director, gimandoan si Elmer sa ilang opisyal nga mohatag sa iyang affidavit kabahin sa pagdakop nila ni Victor kay usa man siya sa misiksik sa kuwarto diin didto nasakmit ang daghang shabu.
Gipanguyawan na si Elmer. Kini unta maoy gusto niya nga matabangan ang ilang dinakpan pinaagi sa dili pagpatug-an sa tukma nga gidaghanon sa shabu nga aron makapiyansa si Victor nga amahan ni Fatima.
Gibasa ni Elmer ang affidavit sa iyang mga kaubang polis. Misiga ang iyang mga mata kay gibutang didto nga kapin sa 200 gramos nga shabu ang ilang nasakmit.
Nahuna-huna niya nga lisud na nga siya lang ang maglahi og pamahayag. (Sumpayan)