Bilyako nga polis

Bisan og gibalibaran si Elmer sa iyang opisyal nga tabangan nila ang dinakpan nga amahan ni Fatima aron makapiyansa, apan wala ibalik sa hepe ang P50 mil nga gihatag unta sa batan-ong polis.

“Kuhaon ko lang kanang kuwarta sir kay iuli nako sa naghatag nako ana,” matud ni Elmer sa kalma nga tingog. Apan gitataw sa ilang opisyal nga ang kuwarta himuon niya nga ebidensya.

Mura’g gipanguyawan si Elmer diha nga deritso siya nga gibiyaan sa ilang opisyal. Nagtuo siya nga paimbestigahan siya tungod sa iyang tinguha nga dapigan si Victor nga amahan ni Fatima aron makapiyansa.

Gisundan ni Elmer sa paglantaw ang ilang hepe. Didto kini mipaingon sa opisina sa ilang director. Misamot ang iyang kahadlok kay nakabantay siya nga giwara-wara niini ang binandol nga kuwarta nga iya unta nga isuborno sa ilang hepe.

Milingkod si Elmer sa lingkuranan nga naglantaw sa unahan. Mura’g naglantaw apan wala siya’y gitan-aw. Dayon, nahaigpot si Elmer kay adunay mipikpik sa iyang abaga.

Ang kauban diay ni Elmer nga polis ang miduol ug mipahibalo nga pasudlon siya sa opisina sa ilang director. Misamot nga mura’g nangurog si Elmer kay nasuta na niya nga gitinuod sa ilang hepe ug gisumbong ang iyang gibuhat.

“Lingkud PO2 Elmer Kurap!” nagbuto-buto ang dughan ni Elmer, ilabi na nga gisumpayan sa ilang hepe og laing pulong nga gipuli sa iyang apilyedo.

Diha-diha, mimando ang police director nga padis-armahan si Elmer sa iyang armas. (Sumpayan)