Wrong number

Maayong hapon Mr. Vunot. Ako si Atty. Samuel Bajal. Nakadungog ko’s nahitabo nimo. Dapat mabayaran ka’g danyos sa nahiaguman nimo. Tungod sa kadanghag sa production nga imong gialagaran” tingog sa telepono sa pikas linya.

 Ning sayong kahaponon, nahibulong si Gaspar nga usa ka stuntman nga nadisgrasya kun nganong nakatoltol og tawag ang abogado sa lawak niya sa ospital. Naggunit si Gaspar sa telepono samtang naglingkod sulod sa lawak human gitunol sa nurse pagbagting, nga para niya ang tawag. Ang nurse nagbarog taliwala ni Gaspar ug sa lamesita diin gipatong ang telepono.

Stuntman sa pelikula si Gaspar. Siya ang mo-double sa mga leading men kun lisod ug peligro ang action sa shooting sa pelikula nga pagahimoon. Napulo ka tuig na siya nga stuntman. Ug karon pa siya nadisgrasya sa shooting.

Gipagamit siya’g crutches human og opera sa iyang bukog sa toong tiil ubos sa tuhod. Nabalian siya human nahulog paglayat sa usa ka props sa shooting nga gabok ug wala naayo sa pagpabarog ug pagpahimutang.

Kontento siya sa iyang suweldo isip stuntman ubos sa Sagbay Luwag Productions, Inc. Ang kompaniya ang nag-abaga sa tanang gasto niya sa ospital, lakip na sa tambal ug doctor. May suweldo pa siya matag adlaw bisan nga naa siya sa ospital, sama ra nga niapil gihapon siya og shooting. Unya, karon may abogado nga nihagad nga pabayaron og danyos ang production.

“Sorry, attorney. Wrong number ka!” ni Gaspar. Ibutang na unta niya ang telepono. Gipasa sa nurse. Apan nadungog pa niya ang abogado nga daw namugos. “Nganong wrong number man? Si Gaspar Vunot man kaha ka?” sa pikas linya. “Gusto nimong ikiha nako ang productions? Unya ikaw ang abogado nako?” ni Gaspar. Medyo napikal na. “O. Mao na akong gustong mahitabo” sa pikas linya.

“Prangkahan na lang gyud tika kun mao  kana. Kay di man pabalibad nga wrong number ka. Una, dili matarong pamatasan nga ang usa ka abogado maoy manghagad og kliyente. Ikaduha, I don’t want to bite the hands that feed me!” ni Gaspar dayong pasa sa telepono ngadto sa nurse. Wa na maghulat sa tubag sa abogado. Nakapamid-ok ang nurse ug nakabuhi’g hilaw nga pahiyom pagdawat sa telepono. (Kataposan)