Wala magdahom si Janice nga makabuhat si Lito niini ngadto kaniya. Gamay ra kaayo ang hinungdan, nireklamo lang siya kun nganong gamay ra ang iyang kita sa pag-drive og trisikad, gitamparus lang dayon siya.
Sukad lang nga nag-drive ni si Lito og trisikad nagduda na si Janice nga naggamit ang iyang bana og shabu. Lahi na ang iyang mga linihukan, niadto pormal kaayo siya apan karon dili na makapugong sa iyang linihukan prangka na usab manulti dili igsapayan kun dunay masakitan.
Tungod sa gibuhat ni Lito kaniya, nagmahay siya. Si Lito lang ang naka-ako sa pagtamparus kaniya. Ang iyang mga ginikanan nga maoy nagpadaku niya, wa gani maka-ako sa pagkusi lang gani sa iyang panit. Nakahunahuna si Janice nga makigbulag kang Lito. Total wa pa sila’y anak, wa pa usab sila makasal. Iyang nakita nga wa siya’y maayong kaugmaon sa tawong adik. Iya nang nakita sa mga tawong adik adik iresponsable, siguruon ang bisyo bahala’g gutman ang pamilya.
Usa ka gabii niana, nahibulong si Janice kun nganong wa pa mouli si Lito. Alas onse na lang sa gabii apan wala pa moabot. Gikulbaan siya kun unsa nay nahitabo ni Lito.
“Maayo, maayong gabii diha Janice.”
Giablihan ni Janice ang pultahan ug iyang nakita si noy Terno ug si noy Tasing nga mga tanod sa ilang barangay. “Day Janice nia mi day kay pahibaw-on ka namo nga naapil og dakop ang imong bana sa mga polis, shabu ang hinungdan day.”
Nakalitan si Janice sa maong balita. Wa siya makasabot sa iyang gibati, kaguol ug kalipay.
Kinsa bay dili maguol nga imong bana ang nadakpan nag-uban kamo karon apan, kalit lang siyang mibiya. Gibati usab niya ang dyutay nga kalipay tungod kay kini kahigayonan nga makabiya siya kang Lito. Ang pagtamparos ni Lito kaniya nagpasabot kini nga sayon ra unya ang pagkulata kaniya. Sa laktod wa siya’y maayong kaugmaon sa tawong adis-adis.
Pagkaugma sayo si Janice mibangon ug nangandam aron makapauli sa iyang mga ginikanan. Sa iyang hunahuna nakahukom siya nga dili na gayud makig-uli pa ni Lito. (Katapusan)