Suki nga pasahero

Gipaningot sila si Val ug Lorena sa pagsinayaw. Nasigpatan ni Val nga ang mga ginikanan ni Lorena diha sa daplin sa diskohan ug mitan-aw kanila nga nagsayaw. Nasabot ni Val nga nalingaw kaayo ang mga ginikanan ni Lorena nga malipayon kaayo sila nga nagpares pagsayaw ug ang ilang anak.

Apan kalit lang nga nag-brownout. Mihugyaw ang katawhan taliwala sa kangiob. Nagginunitay sila si Val ug Lorena. Giadto nila ang dapit nga didto nagtindog ang mga ginikanan sa dalaga sa wala pa mag-brownout.

Tuod, ilang nakit-an ang mga ginikanan ni Lorena. “Anugon kaayo dong, Val, kay nag-brownout man. Enjoy na unta kaayo mo’g sayaw si Lorena,” matud ni Carling nga amahan sa dalaga. “Salamat kaayo nong Carling. Buyno, dili na tingali ni mosiga pa, mopauli na lang ko Lor kay gabii na man ‘sab,” giingnan ni Val ang mga ginikanan sa iyang girlfriend. “Mas labing maayo nga ihatud nimo si Val sa karsada Lorena kay ngitngit ra ba, ug wala pa kaayo siya mailhi dinhi sa ato,” matud ni Carling.

Gitunol ni Carling ngadto kang Lorena ang gibitbit niini nga flashlight. Tuod gihatud ni Lorena si Val didto sa daplin sa karsada. Ngitngit g’yud tuod kaayo kay bisan sa atbang nga bahin sa karsada wala usab magsiga ang suga.

“Nagdungan pag-brownout ang duha ka feeder sa kuryente kay lahi man nga feeder ang atbang,” matud ni Lorena. “Wala’y problema Lor, magpasalamat pa gani ko sa brownout,” ni Val pa nga miagbay sa dalaga.

“Ngano gud tawon nga malipay ka man nga mag-brownout. Nahunong ang disko unya ngitngit pa kaayo nga nag-atang kita og kasakyan nimo,” matud ni Lorena.

“Ang ipasabot nako nga malipay ko kay basin og imo ko nga tugotan nga maka-kiss nimo,” giingnan ni Val si Lorena. (Sumpayan)