Dear DJ IndayMisyel,
Tawaga lang ko og Love-Love. Ang akong problema bahin kini sa akong inahan nga magsige og pangaway kanako. Duna man gud ko’y ka-live in, duha na ka tuig. Unya kun mouli ko sa amo, balikason ko sa akong inahan. Gadala lang kuno ko og buwisit!" kanunay lang nako madungog kini’ng mao nga mga pulong. Ngil-ad kaayo uy, sige lang mi og away, ilabi na og moingon nga dili ko makakuwarta sa akong kapuyo. Ngil-ad ba nga ang akong ka-live in usa lang ka construction worker? Unsaon naman ni nako? - Love-Love
Dear Love-Love,
Ang hinungdan tingali nga si Mama nimo wala makauyon sa imong kapuyo mao nga nalantaw niya nga dili hayag ang imong kaugmaon sa iyang kiliran. Tiaw muna, mag-ulian ka pa sa inyo’ng balay ug moadto na usab sa imong kapuyo. Dili man problema kun usa ka construction worker ang imong mapilian nga himuon’g kapares sa kinabuhi kay kun maninguha lang kini makahatag ra gihapon siya og kaharohay sa inyong pagpuyo ug magmalipayon ra ang inyong pamilya.- DJ Inday Misyel