Dear DJ Inday Misyel,
Problema ko karon tungod kay nakasala ko sa akong mama. Akong gikawat ang iyang necklace nga balor og P10,000. Unya ako kini giprenda ug nadawat lang sa P5,000. Karon maglisud ko unsaon nako kini paglukat nga naglisod gani ko kay ang akong pang-tuition nagasto ‘sab nako kay gipalit og pantalon. Unya ang gipasanginlan ni mama nga nagkuha sa iyang kuwarta mao si ate. Milayas ang akong ate ug tua sa ilang lola mipuyo. Inday Misyel nakunsensya na ko. Unsa ang akong buhaton? - Aning
* * *
Dear Aning,
Una nimo nga buhaton, pangayo'g pasaylo sa God sa imong gibuhat. Ikaduha, pag-usab sa kaugalingon ug ipasalig nga dili na nimo usbon ang pagpanghilabot sa butang nga dili imo. Kaloy-a ang imong mama, labi na ang imong igsuon nga maoy napasanginlan. Ikatulo, tug-ani sa tinuod ang imong mama aron mapangitaan og paagi nga malukat ang giprenda nimo nga kuwentas kay basin may sentimental value ang maong alahas. Unta mabalik ang maayo nga pagtagad sa imong mama ngadto sa imong ate. Pangayo usab og pasaylo sa imong ate ha? - DJ Inday Misyel