Sa hilom nabalaka ko. Tingali’g masuko si Nanay Ludy nga wala nako makit-i si Tatay Metodio.
Kini man gud si Tatay palahubog kaayo. Wala man hinuon mi pasagdi apan wala sab siya makakontrol sa iyang bisyo. May mga higayon nga masuko si nanay tungod sa iyang pagka-palainom. Magpakahilom lang si tatay kon masuko si Nanay.
Gikan sa merkado, miadto ko dapit sa may munisipyo aron pagpangita ni tatay Metodio. Apan wala gyud nako makit-i ang akong amahan. Mipauli na lang ko kay hapit na motikyop ang kagabhion. Basin og nahiuli na sab si Tatay sa amo.
Misulod ko sa balay. Gipahibalo ko si Nanay nga wala gyud nako makit-i si Tatay. Apan wala magpalibak ang akong amahan. Nahiabot kini pagkatautaod nga nagsusapinday sa kahubog. Didto diay siya sa balay sa usa ka konsehal sa among lungsod nga iyang kompare kay maoy nangugos sa pagbunyag nako. Nag-inom sila maong nahubog si Tatay.Igo lang nagpanglingo si Nanay.
Nianang pagkaugma, nakahigayon si Edward sa pagpakigsulti nako sa among eskuwelahan. May gihangyo siya nako.
Gibalibaran ko si Edward sa butang nga iyang gihangyo nako. Namugos siya apan hugot gyud kaayo ang akong pagbalibad. – Sumpayan pa