“Oo, Jerome. Si Edward ang akong boyfriend.”
“Kun mao kana, tinuod gyud diay ang tabi-tabi sa atong mga classmate nga may relasyon kamo si Edward. Gipakaingon ko ba’g suod lang kamong managhigala.”
“Childhood sweetheart nako si Edward, Jerome. Sa dagko na kami, aduna kami MU. Hangtod nga nagkahigugmaay gyud kami sa hingpit.”
“Pagkasuwerte ni Edward, Jezebel, nga maoy nakaangkon sa imong gugma.”
“Hinaot nga dili mo kami samokon.”
“Dili ko makapasalig niana, Jezebel.”
“Unsay buot mong ipasabot?”
“Bisan nasayod na ako nga nagkahigugmaay na kamo si Edward apan wala ko ma-discourage. Ipadayon ko gyud ang pagpangulitawo kanimo.”
Nabalaka ko sa gisulti ni Jerome. Kun tinud-on niya ang iyang gisulti nga ipadayon niya ang pagpangulitawo nako luyo sa kasayoran nga may relasyon na kami si Edward, seguradong makabaton ako’g problema sa relasyon namo ni Edward.
“Mag-usik ka lang sa imong panahon, Jerome,” giingnan ko siya. “Si Edward na maoy tag-iya sa akong kasingkasing ug dili na mausab pa ang akong pagbati kaniya.” - Sumpayan pa