Buot nang molikay si Rey kang sister Veronica kay mosamot lang ang bation niining kasakit sa higayon nga makita niini ang madre.
“Moistar una ko’g pipila ka adlaw dinhi sa imong balay, Benturada,” namulong si Rey pagkilab sa pipila ka daklit. “Kun masugakod na sa akong lawas, mobiya na ko dinhi.”
“A-asa ka man diay paingon, Sir?” Pakisayod ni Benturada.
‘Wala pa ko masayod,” ni Rey pa. “Bisan asa lang unya ko idagsa sa kapalaran niini.”
“Unya, Sir,” ni Benturada pa, “unsaon na man lang bahin sa imong trabaho isip usa ka polis?”
“Unya na kana nato hisgoti, Benturada. Sa pagkakaron, wala pa ako masayod kun unsay angay kong buhaton. Basta tumana lang ang gibaod ko kanimo. Kinahanglang wala’y usa nga masayod nga ania ako sa imong gipuy-an.”
Milabay ang lain pang usa ka semana. Ang gibaud ni Rey kang Corporal David Benturada gituman gayod sa naulahi. Wala gayod motug-an si Benturada sa iyang mga kaubang polis, bisan gani kang Capt. Sancho Benale ug ilabi na gayod kang sister Veronica, nga si Rey midangop sa iyang gipuy-an.
Mi-lie low og diyotay ang kapolisan sa pagpangita kang Rey. Ingon sa ilang namatikdan nga ingon sa wala gayo’y diyotay’ng timailhan nga ilang makaplagan si Rey. Wala lang sila’y kalibotan nga ang ilang gipangita atua ra sa gipuy-an ni Corporal David Benturada. – (Sumpayan pa)