May nilingkod ning sayong kahaponon sa lingkuranan dikit sa usa ka bakanteng lamesa sulod sa Snack Vision sa Green Meadow Mall ning dakbayan. Gilabyan lang una ni Maricor nga maoy silbedora kay duna siya’y gihipos nga bag-ong gibiyaan sa kustomer. Ang mga baligya ining tindahana lainlaing matang sa kape, juice ug tsa,ug mga pan. Samtang nagtrapo si Maricor sa lamesa nilingi ang hamtong lalaki niya.
“Unya na lang ko mo order, Day inig abot sa akong kauban” sa customer.
“Ok lang sir,” ni Maricor. Pero wa magpahiyom. Nagsigeg tan-aw sa iyang relo sa walang pulso ang customer.
“Unsay naa sa inyong juice?” sa tawo sa pagbalik ni Maricor og agi sa iyang duol. Nausab ang hunahuna. “Tan-awa lang diha, sir sa menu” ni Maricor. Gitudlo ang dakong tarpaulin nga may mga lista sa lainlaing kape, tsa ug juice. Kining tindahana maguwang lang og gamay sa stall sa merkado. Apan nia sulod sa lobby sa mall. Way ikahatag nga menu sa gamay’ng papel. Ang tibuok menu giimprinta sa dakong tarpaulin nga mora’g banner sa mga tawong nagmartsa sa kadalanan.
Nitindog ang tawo. Nilakang dapit sa atubangan sa counter. Nibasa sa dakong menu. “Orange juice ako Day”, sa tawo.
“Wa lagi mi ana, sir” ni Maricor. Nagminghoy. Naisang kilay sa tawo. Nibasa og balik sa menu. “Ice tea?” sa tawo. “Wa gihapon, sir” ni Maricor. Niping-it.
“Mao na ganiha, Day. Nga nangutana lang ko kun unsay naa ninyo. Para unta ang imong tubag seguradong naa. Imo pa man kong gipabasa ining menu nga daghang nalista nga mabasa, apan wa man diay!” sa tawo.
“Sorry, kaayo, sir. Lemon juice ra gyu’y anaa” ni Maricor. Nihikohiko na. Ganiha medyo nagpa istrikta-istrikta man gud og diyutay. Kay medyo wa kauyon sa hitsura sa customer. Di man gud guwapo. Isogon og nawong. Kun di magpahiyom, mora na’g naglagot.
“Akong tambag nimo, kansela sa listahan ang wa ninyo. Aron dika mahasol og tubag nga wa, kun maoy maorder sa customer” sa tawo.
“Di man mosugot akong amo” ni Maricor. “Nganong di man?” sa tawo. “Kabig man na sa mga customer. Aron ingnong daghan mi’g baligya” ni Maricor. May niabot nga laing lalaki.
“Oy! Engineer. Sorry ha nga na late ko’g gamay” sa batan-ong lalaki nga bag-ong abot. Nitimbaya sa hamtong nga lalaki. “Ok lang, Fred. Nalingaw ko’g panan-aw sa menu. Aron mo-order unta ko samtang magpaabot nimo. Niabot na man hinoon ka” sa hamtong tawo.
“Adto na lang ta’s Steve Coffee.Maayo didto kompleto” sa batan-ong lalaki. “Tana” sa hamtong lalaki.
Nisunod na lang og tan-aw si Maricor sa duha ka lalaki. Imbis kabig ang resulta, abog hinoon sa customer. Iya unyang pasabton ang iyang amo sa sugyot sa hamtong nga lalaki. (Katapusan)