Nahilo sa sinungkab!†Way laing pagya ang naglibutlibot sa silinganan nilang Bobby ning kabag-ohan. Ulitawo pa si Bobby.
Way trabaho. Apan buhong sa pagkaon ug ilimnon. Nanambok pag-ayo. Unya beer kanunay ang imnon. Hapit kada gabii tagsa ka kahon mainom. Humba pirmi ang sumsuman. Tungod kay naa siya’y sugar mommy.
Si Adela iyang sugar mommy. Ang asawa ni Lucio, tiguwang biyudo nga retirado nga magtutudlo. Dako’g madawat nga kuwarta ang retirado matag bulan. Kay duha iyang pension. Gikan sa GSIS ug SSS. Kay nakatudlo man sab siya’g pribado nga eskuylahan. Si Adela ang tigpa-cash sa binulan nga mga tseke sa tiguwang. Siya ang nag-budget sa maong pension. Mas dako iyang datung ngadto ni Bobby nga kaedad ra niya, 25. Kay si Bobby maoy tighuman sa masugdan sa tiguwang.
Ang romansa sa tiguwang igo rang makapainit sa lawas ni Adela. Unya, maluya dayon ang tiguwang ug makatulog. Inig ka hinanok sa tiguwang, mobalhin si Adela og laing lawak diin tua na daan si Bobby. Gihatagan ni Adela og yawe si Bobby. Aron makasulod sa balay sa tiguwang bisa’g unsang orasa. Tulo ka tuig nga ingon niini ang sitwasyon. Duha nay anak nilang Adela. Nga malipayong giangkon sa tiguwang.
Way makapanalipod sa tiguwang gikan sa binuang sa asawang batan-on. Kay tungod sa kadawo ug kasalbahis sa tinagdan sa tiguwang sa iyang duha ka anak lalaki, nanglayas sila. Ug gipanghimaraut nila ilang amahan.
Napalgan na lang si Bobby usa ka buntag nga wa nay kinabuhi. Gibangungot, pangagpas sa ubang silingan. Kay wa may samad o bun-og. Way foul play nahitabo. Apan ang resulta sa autopsy nagmatuod nga giatake si Bobby sa kasingkasing ug hayblad. Nabugtuan og ugat sa utok. Pero ang kadaghanan sa iyang mga silingan moingon gyud nga nahilo siya sa sinungkab. (Katapusan)