Tilaw-tilaw lang - Gula 4

Wala pugsa ni Brady nga mapasugot niya ang dalagita sa mao nila nga panag-uban. Hapit na mokilum-kilom nga namauli ang grupo. Diha ra manganaug sila si Nancy ug ang duha niya ka kauban sa duol sa karaang building sa Compania Maritima.

Ang usa ra ka kauban ni Nancy maoy adunay selpon kanila’ng tulo ka dalagita. Walay nahimo si Brady gawas sa paghatag ni Nancy sa iyang contact numbers ug giingnan nga kun gusto’ng mokontak kaniya manghuwam lang og selpon sa iyang amiga.

Nasiguro ni Brady nga nalingaw ang tulo ka dalagita sa ilang pagpangaligo sa dagat ug hitsas pa sa pagkaon. Sanglit Sabado, nakahukom si Brady nga mosuroy sa kinaham niya nga department store nga maoy sagad niya suroyan.

Wala gayud masayop sila si Brady ug Carlo nga nindot kaligoan ang linaw kay dili na kinahanglang maligo pa pag-usab tungod kay tab-ang man ang tubig nga ilang gisawom-sawoman.

Human ika-parking ni Brady ang iyang awto sa parking area sa dakung mall sa North Reclamation Area, diha pa niya mabantayi nga may text message diay nga iyang nadawat.

Wala ma-phone book sa selpon ni Brady ang numero sa nagpadala sa message apan sigurado siya nga ang mga dalagita maoy nag-text kaniya kay nagpasalamat kini nga gidala sila og pangaligo. Gitawag ni Brady ang nag-text kaniya. “Hi, Brady ni. Kinsa ni palihug?” gipangutana ni Brady. “Si Sheila ni uy, pero dia si Nancy gusto nga makigsulti nimo,” matud ni Sheila nga nagkatawa.

“Hello,” kalma kaayo ang tingog nga nadungog ni Brady. “Thank you kaayo ha? Lipay g’yud kaayo mi nga nakauban nimo,” matud ni Nancy.

“Walay problema, manuroy unya ta pag-usab,” iyang giingnan si Nancy. “Manuroy kuno ta’g usab Sheil,” nadungog ni Brady si Nancy nga mitug-an dayon sa iyang sugyot nga manuroy sila’g usab.

Giingnan ni Brady si Nancy nga gusto niya nga manuroy sila nga dili kauban ang duha ka barkada sa dalagita. “Mas malingaw ka g’yud kun manuroy ta nga kita ra,” matud ni Brady.

“Asa man ta manuroy?” matud ni Nancy. “Ikaw ang magbuot kun asa ta manuroy. Unsa man, pwede ka ugma? Domingo bitaw ugma Nanz,” giingnan ni Brady ang dalagita.

Wala dayon makahukom ang dalagita. Apan taud-taud, misugot ra kini nga manuroy sila ini’g ka ugma nga sila ra’ng duha. “Kun sayo ta nga mogikan kinahanglan nga dili ta magpagabii,” matud ni Nancy.  (Sumpayan