Duty ni Randy isip desk officer sa usa ka police station dinhi sa dakbayan sa Sugbo. Nagduka na si Randy kay lapas na ang tunga’ng gabii ug wala’y mga midangop sa police station aron moreklamo.
Migawas si Randy sa atubangan sa police station aron dili siya malupig sa duka. Gikan sa iyang nahimutangan madungog ra ni Randy kun adunay motawag sa UHF radio ug sa telepono.
Gisinyasan niya ang tigbaligya og painit kilid sa police station nga magpakutaw siya’g usa ka tasa nga kape ug ipahatud ug pakapinan og usa ka pan pransis.
Wala tuod madugay, diha na ang naninda og painit nga naghatud sa tinimpla nga kape ug gipatong ra sa ibabaw sa tasa ang pan. Human kabayari ni Randy, mibiya dayon ang naninda og painit. Sagad kuhaon ra sa tindera ang tasa inigkataud-taud.
Anam-anam g’yud tuod nga mikagiw ang duka human nga nakainom si Randy og kape. Kalit nga may misulod nga babaye sa police station. Kay-ag ang buhok ug may burot sa wala niini nga kilay.
“I-report nako ang akong bana sir, gikulata ko karon lang g’yud,†matud sa babaye nga nagbarog atubangan sa lamesa ni Randy. “Ha? Lingkod ma’am,†ni Randy nga mikuha og bondpaper aron iyang pangutan-on ang babaye sa mga detalyi sa hitabo.
“Gelyn Elorde ang akong ngalan sir, naa mi nag-abang sa Guadalupe ug ang akong puyo-puyo nga si David,†matud sa babaye. Gisaysay ni Gelyn nga sagad gayud nga mahitabo nga panahon sa tingsweldo halos hutdon na lang sa iyang kapuyo ang sweldo niini sa tibuok semana. Usahay hatagan na lang siya og P200 kay kuno gipangbayad na sa utang ang uban.
Kaniadtong miaging Lunes, giapas niya si Randy didto sa iyang trabahoan apan nakagawas na kini. Dunay nakatug-an nga nadunggan nila nga mag-inom na ‘sab sila si David ug barkada.
Gisuhid ni Gelyn ang lainlaing mga imnanan sa dalan Colon, V. Gullas ug dayon didto sa Sanciangko. Didto na nasakpi ni Gelyn ang iyang bana nga uban sa duha niini ka barkada sulod sa Wild Orchids bar.
Pwerte’ng sukoa ni David nga giapas siya ni Gelyn. Gibunlot ni David si Gelyn paingon sa gawas sa bar ug gisingkahan nga mopauli. Naghilak si Gelyn nga misakay og PUJ pauli sa ilang giabangan sa Guadalupe.
Hapit na tunga’ng gabii nga miabot si David ug hubog. Gikulata pag-ayo si Gelyn. (Sumpayan)