Dear Tita Salie,
Have a nice day. Tagoa lang ko sa ngalan nga Mikay, taga Bohol apan nia ko karon sa Cebu kay dinhi man ko makakita og trabaho.
Dalaga pa ko ug nagproblema ko karon sa akong lovelife. Kay duna man gud koy nasuod dinhi sa Cebu samtang nagtrabaho ko ug nahimo nako siyang hinigugma kay nanguyab man siya nako.
Wala gyud siya motug-an nako sa tinuod sa sinugdan pa nga minyo diay siya ug kasado gyud siya ug dunay usa ka buok anak. Nisulti na lang siya sa kamatuoran sa iyang pagkatawo dihang human na nakong gitugyan ang akong pagkababaye kaniya.
Nahugno ko dihang iyang gisulti ang tinuod ug nagproblema ko kay love kaayo nako kining tawhana. Unsa may angay nakong buhaton, Tita Salie? Palihog pasabta ko. Thank you so much and God bless you always.
* * *
Everdearest Mikay,
Nahuman na ang hitabo Ug dili na nato ni puydeng balikon aron atong usbon. Busa dawata na lang nga nasayop ka ug paningkamot nga dili na kini mahitabo pagbalik kanimo. Kuhai og leksyon ang nahitabo kanimo aron sa sunod dili ka na daling mohatag og hukom alang sa imong buhaton.
Padayon sa imong kinabuhi ug pasagdi nga sa pagpanglabay sa mga adlaw, bulan o tuig imong makalimtan ang pait nimong kasinatian. Dawata nga nahimo kang biktima sa lalaki nga mapahimuslanon. Busa for the next time nga ma-inlove ka protektahi ang imong kaugalingon ug ayaw kini itugyan sa dakong kasayon. -- Tita Salie