Unom ka kaso ang nalista sa Court Calindar karong buntaga. Kay civil case ang kaso nga gigunitan ni Atty. Armando Agiton, katapusan sa listahan ug dili mauna og tawag. Alas otso i medya sa buntag, nia na siya sulod sa husgado. Batasan niya nga on-the-dot gyud siya nga moabot sa husgado. Bisan na og dili tigsayo ang huwes mosugod og bista.
Kay niya pa, mas maka-relax siya sulod sa husgado. Kay bugnaw ang aircon. Unya sa iyang bupete, way aircon ug malumsan siya’s mga papeles sa iyang lamesa. Wa siya’y sekretarya. Iyang kaskas, iyang sayaw. Daghan kaayo siya’g paper works tungod sa daghang kaso nga iyang gikuptan. Apan kun makatambong siya’g bista, makaeskapo siya’s makalibat nga mga paper works. Magbasabasa ra man siya’g nobela samtang maghuwat magsugod ang hearing, kun wa pay ika-istorya.
Pagsugod og tawag sa unang kaso sa listahan, may nitingog nga manlalaban sa iyang likod. “Good morning, Your Honor. I am respectfully appearing for the accused,†sa manlalaban sa iyang likod nga nagbarog lang sa luyo niya. Wa pa kalingkod ang manlalaban kay mao pay pag-abot sulod sa husgado. Ug tayming nga una iyang kaso sa listahan, maoy pagsulod niya, mao say pagtawag sa iyang kaso. Si Amand kalingion kaayo sa iyang luyo samtang naglingkod sa lingkuranan sa mga abogado atubangan sa taas nga lamesa nga gidungawan sa mala trono nga lingkuranan sa huwes.
“We are ready to present our evidence, Your Honor. But unfortunately, the public prosecutor and the private prosecutor are not yet around. I can accommodate a second call, to wait for them to arrive in the court room†dugang sa manlalaban.
Nakuryoso pag-ayo si Armand sa tingog sa manlalaban. Babaye nga dako’g tingog ug mowawogwawog nga mora’g bading. “Bading man gyud ning abogadoha!†tuaw ni Armand sa kaugalingon. Fluent gyud hinoon mo-Iningles. Way sami sa dila kada pulong. Gi-imagine ni Arman nga nihikohiko ang bading nga abogado sa iyang luyo.
“Okey. Second call†matud sa huwes. Diha pa nilingi si Armand sa iyang luyo. Unya daw di siya katoo sa iyang nakita. Si Sheryl diay nga iyang kaklase sa law school. Nanambok. Nidako ang tingog nga mora na hinoo’g bading paminawon. Iya na lang gisinyasan og thumbs up. Gikidhatan ug gipahiyoman. Nipahiyom niya si Sheryl. Ug nilingkod tupad niya. Nag-apir sila. Ingon gyud niana ang relasyon sa mga abogado. Brother lawyers and sister lawyers. Way insultohay. Ang naa’s hunahuna nga dili maayong paminawon kun isulti, dili na lang isulti. Sa inahan pa sa rabbit nga higala ni Bambi “If you cannot say anything nice, do not say anything.†(Kataposan)