Dear Tita Salie,
Maayong adlaw kaninyong tanan diha sa Banat News ug sa tanan nga tigbasahan niini, ug labina kanimo, Tita. Abi nimo ganahan kaayo ko mobasa sa imong column kay malingaw ko sa imong mga tambag.
Just call me Nanty, from Negros Oriental, 22 years of age, ug nagtrabaho ko sa Zalos convenient store. Ang akong problema, Tita, kabahin kini sa igsuon sa akong uyab karon.
Nahasol lang gud ko tungod kay hangtod karon nasuko lang gihapon kini siya kanako. Tungod kay sa una nag-textmate man gud mi unya duna mi giawayan. Tungod sa akong kalagot ako siyang nainsulto. Sukad niadto wala na kami maayong tinagdan sa usa’g-usa.
Dili ko ganahan sa among sitwasyon labina uyab nako ang iyang magulang ug seryoso na kami sa among relasyon. In fact nagplano na mi nga magminyo karong tuiga. Pero alang kanako, Tita, dili maayo nga masuko pa siya nako tungod kay kung magkadayon na kami sa iyang igsuon mamahimo ko na siyang sister in law. Unsaon na man lang unya kun muadto ko sa ilaha o makapuyo mi sa ilang balay?
Gusto unta ko, Tita, nga dili na siya masuko nako ug iya nang kalimtan ang nahitabo kanamo. Palihug pasabta ko. Daghang salamat sa imong pagtagad. More power and God bless.
* * *
Hello Nanty,
Nakasabot ko sa imong punto ug sa buot nimong mahitabo. Maoy imong gusto nga wala’y sabit ang imong kinabuhi ug maayo ang inyong relasyon ngadto sa pamilya sa imong hinigugma. Busa sa dili pa nimo ipadayon ang inyong mga plano, mas nindot gyod nga mawagtang una ang kasuko sa ubang miyembro sa pamilya diha kanimo. Kay bisan pa man kun maglain mo pagpuyo kun magminyo gyod mo apan duna gyo’y mga kahigayonan nga muadto ka sa ilang panimalay, ug kinsay nasayod usab nga didto mo mopuyo uban sa igsuon sa imong uyab.
Mas maayo nimong buhaton nga imong hangyuon ang imong uyab nga maoy mamahimong tulay aron inyong estoryahan ug wad-on ang unsa may inyong gikabingkilan. Imong ipasabot ngadto sa imong uyab ang imong maayong tinguha tungod kay kamo gyod ang magkadayon sa mosugot mo ug sa dili mamahimo gyod nimo siyang igsuon.
Puyde usab nga magpatabang ka sa ilang mama kay segurado ko nga morespeto gyod siya sa ilang inahan. Imong isulti ngadto sa ilang mama ang sitwasyon ug magpatabang ka kaniya aron siya na mismo ang mosulti niini ngadto sa iyang anak. Ayaw kalimti nga ang maayong intention hatagan gyod kini og maayong kabubut-on.
Mas maayo usab nga muadto ka sa ilang panimalay ug kuyog sa imong uyab mangayo ka og pasaylo sa iyang igsuon. Mao gyod kini ang labing effective sa tanan nimong buhaton. -- Tita Salie