Sex exchange

Segurado ka Ms. Berdon, nga babaye gyud ka, biologically and physically?" sukot ni Judge Rel Becalas ngadto ni Ariel Berdon nga naglingkod sa witness stand sulod sa husgado. Karong buntaga, nagiyahan na ni Aty. Alex Tudtud si Ariel, iyang kababata, sa tanang angay niyang isulti mahitungod sa iyang petition for correction of entry in birth records.

"Yes, Your Honor. I'm sure of it" ni Ariel nga nipasiklap sa iyang abogado. Babaye gyud siya tinuod, tan-awon. Angayan kaayo sa iyang bistidang gisul-ob. Mistesahon. Maanyag, Madanihon. Daghang mosublisubli pagsud-ong niya dinhi sa husgado.

Apan nasayod si Alex nga bayot si Ariel. Napugos lang siya'g laban ni Ariel ining iyang petition kay nakomiter siya. Isip suod nga silingan kaniadto sa wa pa sila kahuman og hayskul, nisulti na daan si Alex ni Ariel nga moeskuyla siya’g abogasya.

"Labani unya ko. Kun may kaso ko" ni Ariel nga naghikohiko adtong tungora.

"O. Basta wa lang ka nanguna. O kun gidaugdaug o gibutangbutangan ka" saad ni Alex.

Wa na sila nagkita paggradwar nila sa hayskul. Pagkita nila’g usab, abogado na si Alex. Ug nakugang siya, kay babaye na gyud tinuod (hasta tingog) si Ariel. Kun wa pa nagpaila, di kaila si Alex kun kinsa ning mistesa nibisita niya. Nibalibad primero si Alex sa paghisgut ni Ariel sa kasong iyang gustong ipasaka.

"Lisod na mahimo imong gusto. Duol na's imposible" ni Alex nga naglingolingo.

"Nisaad baya kung imo kong labanan" nanudya ang higala.

Wa katingog ni Alex. Nakahangad sa kisame.

"Maka-produce ka’g Certification nga pirmado og doctor nga ikaw babaye gyud?" ni Alex sa pinabundak nga tono. Iya na lang gibungatan og requirement nga dili ma-comply.

"Kun makadala ko ana, imo kong labanan sa akong petisyon?" ni Ariel. 

"O" ni Alex. Kay nagdahom nga dili kakuha sa dokumentong gisitar.

Unya niisyu si Ariel og tseke nga pay to cash balor og singkwenta mil pesos. Gitunol niya ngadtong Alex.

"Unsa man ni?" ni Alex. Gidawat.

"Oy kadako god ini!" dugang niya. Nakurat.

"Wa kay bayranan nako ining imong kaso. Filing fee lang, publication ug transcript of stenographic notes" ni Alex.

"Isipa lang nang consultation fee" ni Ariel dayong biya.

"Kadatu na gyud diay nimong kagwanga ka!" ni Alex nga nisunod og tan-aw sa kliyente nga nigawas sa pultahan ning sayong kahaponon.

Pagkaugma sa buntag, nibalik si Ariel sa bupete nga nagdala og Certification nga pinirmahan ni Dr. Edward Cuenca.

"Bahala na ni! Total may doctor mang nipirma sa maong certification" tuaw ni Alex sa hilom. Di na siya kabalibad ni Ariel.

"Akong ipatan-aw ug ipahiling imong tibuok lawas sulod sa chamber. Si Miss Teddylyn Reyes ang Court Interpreter maoy akong patan-awon. Inig kahuman, ako siyang pangutan-on kun gamit ba sa babaye o sa lalaki iyang nakita" sa huwes. Nanulod si Teddylyn ug Ariel sa chambers. Nanira.

"Patay! Tuaw ni Alex sa hilom. Pormal iyang nawong. Poker face. Apan gipaningot siya bisa’g bugnaw ang aircon sa husgado. Ug nangluspad. Kay kuyaw man siya’g ma-contempt sa huwes. Kay nakigkunsabo sa kliyente sa pag-ilad sa husgado. Ang ilang petition, pagpakoreher sa Birth Certificate ni Ariel sa sex. Gikan sa male ngadto sa female.

Nagpahiyom si Teddylyn paggawas nila. Nibalik si Ariel sa witness stand. "Unsay imong nakita Miss Reyes?" sa huwes.

"Female sex organ, Your Honor" ni Teddylyn.

"Whew!" hilom nga nahuwasan si Alex sa kakuyaw. Apan wa siya kasabot nganong naingon adto. "Petition granted!" sa huwes.

"Atty. Tudtud, you may get a copy of the Order any time this afternoon. Session adjourned" dugang niya dayong dokdok sa kahoy nga martilyo sa dokdokanan.

"Thank you very much Your Honor" ni Alex dayong tindog. Niginhawa’g lawom.”

Pag-abot nila’s bupete, nangutana gyud si Alex ni Ariel.

"Daghan na ko’g mga beauty parlor sa Manila. Nagtigum ko’g kuwarta para’s akong operasyon. Operado na ko ni Dr. Belo" ni Ariel nga mapasegarbohon. Nakaapir si Alex sa iyang kliyente. (Katapusan) (Aron makalibre og konsulta, dad-a ning pahina sa opisina sa tagsulat. Iatol og Sabado)