CEBU, Philippines - Midaog sa ikaduhang sunod-sunod nga higayon ang Power Forty ug ang Aulga Hardware batok sa tagsa-tagsa nilang kaatbang sa Guadalupe Golden 50s Basketball Club First Conference sa miaging adlaw didto sa Inayawan Sports Complex.
Ang host team Power Forty nakaipsot batok sa BTBA, 80-76, samtang ang Aulga Hardware miihaw sa Tejero Bulldogs, 93-72.
Gawas nga nidaog, ang Power Forty ug Aulga Hardware mipahamtang sab og ikaduhang sagunson nga pilde sa BTBA ug Tejero Bulldogs.
Si Michael Arias mao gihapon ang topscorer sa Power Forty uban ang 13 puntos. Ikaduhang topscorer sa Power Forty nga mibangon human malubong og 12 puntos sa first period, 12-24 mao si Al Misa sa iyang 12 puntos, gisundan ni Roger Cabatas nga adunay 11 puntos.
Sama sa una
nilang duwa, si Ramon Ceballos mao sab ang nangu sa BTBA nga mipabuhagay og 23 puntos, samtang si Boy Cabanero mitampo og 11 puntos.
Sa laing bahin, unom ka players sa Aulga Hardware ang miiskor og double figures pinangulohan nilang Gaga Cabanilla ug Roy Galon nga parehong mitimbre’g 20 puntos, samtang ang laing upat nagtampohay og 10 puntos.
Si Dede Ferraren mitikdol og 14 puntos, samtang si Benjie Tudtud mitimang og 13 puntos aron pangulohan ang Tejero Bulldogs nga mikagat og 0-2 record.
Sa laing aksiyon, ang Tisa Top nakabawi human masugamak sa una nilang duwa dihang ilang gipahimungtan ang MCWD Union, 83-80.
Gipangulohan gihapon ni Freddie dela Campo ang Tisa Top nga mikabkab og 23 puntos. Mipakita sab sa iyang labok si Boy Babatid aron moamot og 18 puntos ug ingon man si Doming Nomio nga miabuno’g 14 puntos. Sila si Nick Seno ug Taneza mihirit og 12 puntos matag usa alang sa Tisa Top nga aduna na’y 1-1 nga baraha.
Miiskor unta og 35 puntos si Armistes Marata, apan di kini igo sa pagpadaog sa MCWD Union. Si Emot Salcedo mikandos og 19 puntos nga wala pa’y daog sa duha ka duwa.
Puntos matag usa
Unang duwa:
POWER Forty (80) – Arias 13, Misa 12, Cabatas 11, Ebrado 9, Ozon 7, Cantarona 6, Dela Rama 5, Fuentes 5, Mosqueda 4, Lim 4, Dayota 2, Rama 2.
BTBA (76) – Ceballos 23, B. Cabanero 11, Despi 8, Cabrera 8, Desuyo 7, Caballero 4, Chinghay 4, Rocamora 4, Honoridez 2, Cabreros 2, Caburnay 2, Cabanero 1.
Ikaduhang duwa:
TISA Top (83) – Dela Campo 23, Babatid 18, Nomio 14, Seno 12, Taneza 12, Lazaga 5, Taneza 2, Petallar 1.
MCWD Union (80) – Marata 35, Salcedo 19, Jumao-as 5, Calumpang 5, Arroz 4, Nicanor 4, Chan 4, Dalena 2, Jagmoc 2.
Ikatulong duwa:
AULGA Hardware (93) – Cabanilla 20, Galon 20, Cortez 10, Miñoza 10, Aniñon 10, Posadas 10, Aulga 8, Arias 5, Badrana 4.
TEJERO Bulldogs (72) – Ferraren 14, Tudtud 13, Ybañez 10, Solon 6, Romeo 6, Amen 5, Auditor 4, Francisco 3, Ocampo 3, Dela Victoria 3. (BANAT NEWS)