Nag-umol og criminal

Nanawagan si Senador Imee Marcos og lawom nga imbestigasyon sa smuggling sa mga produktong agrikultura ug sa tinud-anay nga paglutos sa mga smugglers sa Department of Agriculiture ug sa Bureau of Customs. Angayan tinud-on pagtaral ang mga kanahan tungod sa pag-antos sa katawhan ni’ng ilang tinonto. Apan dili ba usab kaha mabasol ang gobyerno tungod kay ginaingon man nga “ang naghinobrang buhis maoy hinungdan ngano nga adunay smuggling”? Ginaingon pa gayod nga “daghan ang gipanday nga balaod nga nag-umol og mga kriminal, apan diyotay ra ang balaod nga nagsilot kanila”. Madahaan!

Walay labot sa panawagan

Giawhag sa poll watchdog nga Legal Network for Truthful Elections (LENTE) ang publiko nga batokan ang pag-oktaba sa gitakda na nga barangay ug SK election karong Disymbre 2022. Ang pagpunay og oktaba sa barangay ug SK election dili senyales sa demokratikanhong kagamhanan. Hagukâ ang rason sa pag-oktaba nga makadaginot kuno ang nasud sa pundo nga gigahin aron magamit sa laing mahinungdanong katuyoan sama sa pagtubag sa pandemya. Angayan hinumduman sa mga namunoan nga wala maapil sa panawagan sa katawhan alang sa kausaban ang pag-usab sa petsa sa eleksyon.Fezteleern!

Padayon sa pagpangayô

Naglaum ang mga Persons with Disabilities (PWDs) sa dakbayan sa Sugbo nga mahimo silang kabahin sa tumong sa kagamhanan paghimo sa dakbayan nga sama sa Singapore. ug andam sila’ng motampo sa maong damgo sa dakbayan aron sa kapulihay dili na sila magsalig sa ayuda. Dalayegon ang gipadayag sa mga PWD.

Baldado tingale ang ubang bahin sa ilang lawas apan hingpit ug lantip ang ilang pangisip alang sa pag-umol sa mga plano sa kalambuan. Apan samtang wala pa matuman ang damgo nga mahimong Singapore ang Cebu City, padayon lang una sila sa pagsalig sa ayuda. Ay’ta bi!

Malingin nga katarungan?

Gihimug-atan sa negosyante nga si Joey Concepcion ang pagpadayon sa kasamtangan’g COVID alert levels sa nasud kay ang pagpasaka niini pihô nga makapatay sa mga MSMEs o mga gagmay’ng negosyo. Isip batikan’g negosyante, dayag nga adunay basehan ang awhag ni Concepcion, kon itandi sa mga hulga sa ubang health experts. Nagtoo ang akong amigo nga adunay malingIn o ba kaha, lapad nga katarungan ngano nga gipadayon ang hulga sa COVID. Kon mo-insister ang mga health experts, sama ra sila sa mga abortionists nga mikutlo sa kinabuhi sa mga MSMEs nga gisugod na unta pagsamkon. Wa gaba-eee!

Imbitahon si ‘Aquaman’

Luyo sa kasagmuyo nga wala kini mahisguti sa inaugural speech ni Presidente Marcos, mipadayag gihapon og paglaum ang PAMALAKAYA nga mapanalipdan sa bag-ong administrasyon ang katungod sa mga mananagat diha sa Panatag Shoal.

Gawas sa hulga sa navy sa China, suliran usab sa atong mananagat ang kakulang sa modernong himan sa pagpanagat. Hingpit ug tinud-anay nga tabang ang ilang gikinahanglan. Sugyot sa akong amigo, “imbitahon si ‘Aquaman’ sa Malacañang aron mahatagan ug ideya ang atong namunoan unsaon nga modaghan ang kuha sa atong mga mananagat”. Pagkatoytoy!