EDITORYAL - Ang nakaayo sa K to 12

Nagkadaghan na hinuon ang mga negatibong panahom ug opinyon bahin sa K to 12 educational system nga gipatuman karon sa Pilipinas wala ba gayuy maayo nga benepisyo gikan niini?

Daan na kining gisaway ug wala mauyoni sa daghang mga ginikanan tungod kay para kanila dugang gastos lang ang pagpuno og dugang duha ka tuig sa high school.

Ang ilang gipasabot mao ang junior high ug senior high sa high school. Para kanila, ang duha ka tuig nga gipuno nagpadugay lang sa pagtapos sa ilang mga anak sa pagtungha.

Pagkatinuod dunay maayo ug duna sad para sa uban nga dili maayong makuha gikan sa K12 educational system karon.  Magdepende kun kinsay pasultihon.

Sa mga kabus, daghan ang mireklamo kay para kanila ang upat ka tuig nga pagtungha sa high school paigo na para sa ilang mga anak.

Gawas lang sa mga ginikanan nga dunay kwartang ikapaeskuyla sa ilang mga anak ngadto sa kolehiyo, ang uban, malipay ng nakahuman og high school ilang mga anak kay buot na nila silang patrabahoon aron makatabang sa ilang kalisod.

Apan  mayoriya sa mga nakahuman og high school sa karaang sistema, pulos pa nag-edad og 16-anyos, kung buot hunahunaon menor de edad pa sila ug dili pa madawat sa trabaho. Makonsiderar kini nga child labor.

Tungod ba kay ang gobiyerno usahay masinabtanon sa mga kabus? Nga bisan dunay mga kaso sa child labor dili kaayo hatagan og pagtagad gawas lang kung duna nay dautang nahitabo sa bata diha sa trabahoan?

Sa mga ginikanan nga uyon sa K12, kabus man o dili nakasabot nga kun matapos sa ilang mga anak ang junior ug senior high, sakto na sila og edad ug pwede na gyud nga makatrabaho kay kadaghanan nila ana ang edad 18 anyos na.

Pwede na silang magtrabaho ug sa samang higayon magtungha sa kolehiyo. Makatabang pa sila sa ginikanan ug makapadayon pa sa pagtungha aron kab-uton ilang mga pangandoy gamit ang ilang sweldo.

Usa pa, ang Pilipinas nalang ang nasud nga wala mosagop sa 12 ka tuig nga basic education kung wala pa gipatuman ang K12 system.